Papa Leo XIV yasabye inzego z’umutekano za Vatikani kuba abahamya b’amahoro mu mutima wa Kiliziya

Ku cyumweru, Papa Leo XIV yayoboye igitambo cya Misa hamwe n’abagize inzego z’umutekano za Vatikani (Vatican Gendarmerie Corps), mu kwizihiza Mutagatifu Mikaheli, umurinzi w’izo nzego. Mu nyigisho ye, Nyirubutungane yashimiye serivisi batanga umunsi ku munsi, abibutsa ko umurimo wabo ari ubutumwa bwo kuba “abahamya b’amahoro” mu mutima wa Kiliziya Gatolika y’isi yose.

Iyi Misa ya buri mwaka isanzwe iba umwanya w’ihuriro ry’abagabo n’abagore bakora muri izo nzego z’umutekano I Vatican, aho basubiza amaso ku nshingano zabo no ku isano bifitanye n’umurimo w’ivanjili.

Mu nyigisho ye, Papa Leo yibanze ku magambo y’Intumwa Pawulo yandikiye Timoteyo agira ati: “Ntukagire isoni zo guhamya Umwami wacu” (2 Tim 1,8), ashishikariza abari aho kwibuka ko ibyo bakora atari umwuga gusa, ahubwo ari ubutumwa bwitangira Kiliziya.

Yagize ati “Kuboneka kwanyu, kenshi gucisha make kandi gutanga ituze, kwerekana uburyo bwo kubaho, ubutumwa bw’Ivanjili, ibi byose bitari mu magambo ahubwo binyuze mu kureba, kuzirikana n’imyitwarire yuje ubwitonzi, byose bigamije kurinda ubuzima n’umutekano w’ababari hafi.”

Papa yabashishikarije gukomeza gushakira imbaraga mu ndangagaciro z’umukirisitu, agira ati “Ntimugakorere gushaka gutegeka, ahubwo mukorere gutanga serivisi; ntimukore kugira ngo mushimishe abayobozi, ahubwo mujye mubikorana urukundo; ntimukore mubitewe n’ubwoba, ahubwo mubikorane ubushishozi n’inshingano.”

Mu ijambo ryihariye yageneye abakozi bashya binjiye muri izo nzego z’umutekano I Vatican bamaze kurahira, Nyirubutungane yabibukije ko indahiro batanga atari amagambo asubirwamo gusa, ahubwo ari “igikorwa cy’ubwisanzure no kwitanga” gikorerwa mu ruhame imbere y’Imana n’imbere ya Kiliziya.

Papa Leo wa XIV yanashimangiye ko umurimo w’izo nzego akenshi ukorerwa “inyuma y’ibyitabwaho n’abantu benshi,” ariko ko uruhare rwabo mu buzima bwa Vatikani ari ingenzi kandi ntagereranywa.

Yagize ati “Uko kutagaragara cyane, ntibivuze ko ntacyo bimara. Ahubwo, hakorwa byinshi. Birubaka umutekano, umurongo n’icyubahiro. Uwo ni umurimo utarinda gusa abantu n’aho bari, ahubwo ugaragaza ubutumwa bwa Kiliziya bwagutse.”

Yashoje abasaba kuzirikana ko serivisi batanga ari ishusho y’iyogezabutumwa, igaragaza Kiliziya ishaka gutanga amahoro, kubaka icyizere no kurinda ubuzima bw’umuntu wese