Papa Leo XIV yasabye Kaminuza kuba umuyoboro ukomeye wo guteza imbere ubufatanye n’inyungu rusange

Mu ijambo yabagejejeho, Papa Leo XIV yavuze ko amashuri makuru na kaminuza bifite uruhare rwihariye mu gufasha abantu gushaka ukuri, kwegera abakene n’abahezwa, gufasha urubyiruko no kurengera ibidukikije.

Yagize ati “Ibigo muyobora ntibihamagarirwa gusa kwigisha abanyeshuri banyu akarengane gakorerwa abari ku ruhande rw’imbere rwa sosiyete, ahubwo bihamagarirwa no kuba imiyoboro ikomeye iteza imbere impinduka zirambye zishingiye ku bufatanye n’inyungu rusange.”

Papa yagaragaje ko isi iri mu bihe by’impinduka zikomeye zirangwa n’ibibazo byinshi, birimo ugushaka gukura Imana mu mibereho rusange y’abantu, ubukene bukomeje kwiyongera, ikibazo cy’abimukira n’impunzi, ihindagurika ry’ibihe ndetse n’ingaruka zikomeje guterwa n’ikoranabuhanga ry’ubwenge buhangano (Artificial Intelligence).

Yavuze ko byinshi muri ibi bibazo bishobora gufatwamo umurongo n’amahitamo ane y’ingenzi y’ubutumwa bw’Abayezuwiti arimo kwereka abantu inzira igana ku Mana, kugendana n’abahezwa, guherekeza urubyiruko no kwita ku nzu dusangiye ari yo Isi.

Papa Leo XIV yibanze cyane ku kibazo cy’abakene n’abimukira, avuga ko muri iki gihe abantu benshi kurusha mbere babayeho mu bukene cyangwa bagahunga ingo zabo kubera intambara, akarengane gashingiye ku myemerere cyangwa politiki, inzara ndetse n’imihindagurikire y’ikirere.

Yagize ati “Amashuri makuru naza kaminuza z’Abayezuwiti ntibihamagarirwa gusa guteza imbere inyungu rusange n’ubufatanye, ahubwo bihamagarirwa no guha amahirwe abimukira, impunzi n’abaturuka mu miryango ifite ubushobozi buke kugira ngo na bo babashe kubona uburezi bwo ku rwego rwo hejuru.”

Yakomeje asobanura ko iyo ayo mahirwe abonetse, bifasha abo bantu kwinjira neza muri sosiyete no gukungahaza ubuzima bw’amashuri binyuze mu bunararibonye n’imyumvire bitandukanye bazana.

Papa yanagarutse ku ikoranabuhanga ry’ubwenge buhangano (AI), avuga ko nubwo ritari mu ngingo enye z’ingenzi z’ubutumwa bw’Abayezuwiti, ari ikibazo gikwiye kwitabwaho cyane n’amashuri makuru na kaminuza.

Yagize ati “Aya mashuri ashobora gutanga umusanzu ukomeye mu kugaragaza no gusobanukirwa neza ingaruka nziza n’izibi z’ubu buryo bushya bw’ikoranabuhanga, ndetse no gushyira mu bikorwa inyigisho mbonezamubano za Kiliziya mu buryo bujyanye n’impinduramatwara y’ikoranabuhanga.”

Ku bijyanye no guherekeza urubyiruko, Papa Leo XIV yavuze ko kaminuza ari ahantu heza ho kugirira icyizere urubyiruko no kurufasha kwizera ko rushobora kugira uruhare mu guhindura isi.

Papa kandi yasabye ibigo by’Abayezuwiti kuba intangarugero mu kwita ku bidukikije, bitigisha gusa mu magambo ahubwo bikabigaragaza no mu bikorwa bifatika.

Yagize ati “Ndabashishikariza gukomeza kwigisha abaturage banyu ku ngaruka z’ibi bibazo byugarije isi muri iki gihe, ariko kandi mukagira n’imiryango iba urugero rw’imibereho irambye, ubworoherane no gushimira Imana ku mpano zayo.”

Asoza ijambo rye, Papa Leo XIV yibukije ko gushaka ukuri ari imwe mu ntego nyamukuru za kaminuza, kandi ko umuntu wese ushakashaka ukuri aba ari mu rugendo rumuganisha ku Mana.

Yagize ati “Abakora ubushakashatsi, abiga n’abashaka ukuri, baba bashaka Imana, baba babizi cyangwa batabizi.”

Yasabye kandi ko mu mashuri makuru naza kaminuza habaho umwuka ufasha abantu guhura no kumenya Kristu, ari we kuri nyakuri, ndetse ashimangira akamaro k’imyitozo ya roho ya Mutagatifu Ignasi wa Loyola mu gufasha abantu gufata ibyemezo byiza.