Papa Leo XIV yasengeye i Lourdes ashyira igihugu cy’u Bufaransa n’abagituye mu maboko ya Bikira Mariya

Ati “Banyakubahwa banyacyubahiro, Papa ari i Lourdes!” Aya magambo akimara kuvugwa, imbaga y’abakristu n’abasura iyi Ngoro bahise bakoma mu mashyi ndetse bavuza n’impundu, abantu batangira kuririmba izina rya Papa Leo XIV.

Aya majwi yumvikanye hirya no hino mu rwunge rw’Ingoro ya Bikira Mariya i Lourdes, ahantu hazwi cyane ku isi kubera amabonekerwa ya Bikira Mariya wabonekeye Mutagatifu Bernadette Soubirous mu mwaka wa 1858. Muri ayo mabonekerwa, Bikira Mariya yaje kwiyereka Bernadette avuga ko ari Ntakwangirika kw’Imana, ari byo bisobanura izina Immaculée Conception.

Abantu benshi bari bateraniye ku nkengero z’uruzi rwa Gave de Pau rutemba iruhande rw’Ingoro, baje kwakira Umusimbura wa Petero. Abana bazamuraga amabendera, abandi bafite icyapa cyanditseho amagambo y’ikaze agira ati “Murakaza neza Papa Leo.”

Ibyishimo by’imbaga byaje guhinduka ituze rikomeye ubwo Papa Leo XIV yapfukamiraga imbere y’ahantu habereye amabonekerwa, agasenga bucece.

Papa yagenze buhoro azenguruka Ingoro y’Amabonekerwa, akora ku nkuta z’aho hantu hasengerwa, hanyuma acana buji nk’ikimenyetso cy’isengesho n’ukwizera.

I Lourdes ni ahantu hasurwa n’abaturutse mu bihugu bitandukanye byo ku isi, cyane cyane abaza kuhakura ihumure, amahoro n’ubutabazi bw’Imana.

Papa Leo XIV yasengeye kandi abaturage b’u Bufaransa na Kiliziya yo muri icyo gihugu, asaba Bikira Mariya kubasabira.

Yasabye ubwumvikane bwa kivandimwe hagati y’abantu, asengera abakene n’abakeneye ubufasha kurusha abandi, abasanzwe bababara n’abanyura mu bihe bikomeye, ndetse asabira isi amahoro.

Nyuma y’isengesho, Papa Leo XIV yashyize ku meza y’iyo Ngoro ururabo rwa zahabu, impano Abapapa basanzwe baha Bikira Mariya mu rwego rwo kugaragaza urukundo, icyubahiro n’ubwitange bamufitiye.

Ubwo yasozaga isengesho rye, abantu bongeye kurangurura amajwi y’ibyishimo, bakoma amashyi n’impundu.

Uru rugendo rwa Papa Leo XIV i Lourdes rwabaye umwanya w’isengesho no gushyira u Bufaransa, abaturage babwo na Kiliziya yabwo mu maboko ya Bikira Mariya, Umubyeyi wuje urukundo, mu gihe isi ikomeje gushaka inzira y’amahoro n’ubwiyunge.