Papa Leo XIV yashimiye Umwami Felipe VI wamutije indege

Ubu butumwa bw’ishimwe Papa yabutanze ku Cyumweru tariki ya 14 Kamena 2026, nyuma y’iminsi ibiri agarutse i Roma, aho yagarutse ku buryo yakiriwe muri Espagne ndetse anibuka igikorwa cy’ubugwaneza cyaranze Umwami Felipe VI mu gihe indege yagombaga kumusubiza i Vatikani yari yagize ikibazo.

Mu gusoza urugendo rwe rwamaze icyumweru muri Espagne, indege ya Papa yagize ikibazo cya tekiniki cyatumye habaho impungenge ku rugendo rwe rwo gutaha, cyane cyane kubera ko rwagombaga gukorwa nyuma y’ibikorwa byinshi Papa yari amaze iminsi akora mu mijyi itandukanye ya Espagne.

Mu rwego rwo gukemura icyo kibazo no korohereza Umushumba wa Kiliziya Gatolika ku Isi, Umwami Felipe VI yahise afata icyemezo cyo kumutiza indege ye bwite kugira ngo asubire i Roma mu mutekano no mu ituze.

Iki gikorwa cyafashwe nk’ikimenyetso gikomeye cy’ubucuti n’ubufatanye buri hagati ya Leta ya Espagne na Vatikani, ndetse kinagaragaza icyubahiro Umwami Felipe VI afitiye Papa Leo XIV n’ubutumwa bwe.

Papa Leo XIV ntiyahishe ko yakozwe ku mutima n’izo mpuhwe n’ubufasha yahawe. Mu butumwa bwe, yagaragaje ko ashimira cyane Umwami wa Espagne ku bw’iyo nkunga yamugejejeho mu gihe yari ayikeneye.

Ndetse anishimira cyane uko icyo kibazo cyakemuwe n’uburyo abayobozi ba Espagne bamuhaye ubufasha bwihuse.

Abasesenguzi bavuga ko igikorwa cyo gutanga indege bwite y’umukuru w’igihugu atari ikintu gisanzwe, ahubwo ari ikimenyetso cy’icyizere n’icyubahiro gikomeye igihugu kiba gifitiye uwo cyakiriye. Kuri Papa Leo XIV, byabaye ikimenyetso cy’urukundo n’ubufatanye byaranze urugendo rwe rwose muri Espagne.

Urugendo rwa Papa Leo XIV muri Espagne rwabaye kuva ku wa 6 kugeza ku wa 12 Kamena 2026, rusiga amateka y’ubwitabire budasanzwe bw’abakristu n’abaturage muri rusange. Mu gihe yasozaga urwo rugendo, ikibazo cya tekiniki ku ndege ye cyari gushobora gutuma gahunda ze zihinduka, ariko ubufasha bwa Felipe VI bwatumye agaruka i Roma nta nkomyi.