Papa Leo XIV yashyize ahagaragara gahunda y’ingendo ze mu Butaliyani
Papa Leo XIV yatangaje ko muri uyu mwaka azagirira ingendo z’iyogezabutumwa mu bice bitandukanye by’u Butaliyani, mu rugendo rufite insanganyamatsiko igaruka ku mpuhwe, Ubumwe n'Icyizere, cyane cyane ku bugarijwe n’ibibazo birimo abimukira, abangirijwe n’ibiza by’ibidukikije n’urubyiruko rukeneye guhumurizwa.
Ibi byatangajwe n’Ibiro by’Umuryango wa Papa bishinzwe gahunda ze kuri uyu wa 19 Hashyantare 2026, byemeza ko kuva muri Gicurasi kugeza Kanama, azasura Pompeii, Naples, Acerra, Pavia, Lampedusa, Assisi na Rimini.
Ku wa 8 Gicurasi 2026, Papa azatangirira urugendo rwe i Pompeii, ku munsi hazaba hashize umwaka atorewe kuyobora Kiliziya Gatolika ku isi. Azasengera ku Ngoro Ntagatifu ya Rozari y’i Pompeii, ahazwi cyane nk’ahantu hakorerwa ingendo nyobokamana ku Bakirisitu benshi.
Iyi ngoro yashinzwe na Mutagatifu Bartolo Longo, wemejwe n’uyu Papa nk’Intungane mu Ukwakira 2025. Biteganyijwe ko Papa azayoborayo Misa n’isengesho ryihariye rya Rozari, agaragaza isano iri hagati y’ubuyobozi bwe n’ubwitange ku Mubyeyi Bikira Mariya.
Nyuma yaho, azakomereza i Naples, aho azahura n’abapadiri, ababikira n’abakirisitu muri rusange, ashimangira uruhare rwa Kiliziya mu kubaka ubumwe n’ubutabera mu muryango.
Kuwa 24 Gicurasi, Papa azasura Acerra, umujyi uri mu gace kazwi nka Land of Fires, kamaze imyaka myinshi karangwamo itabwa n’itwikwa ry’imyanda yangiza ibidukikije. Aka gace kanavugwamo impfu nyinshi zifitanye isano n’iyo myanda.
Uru ruzinduko ruzagaragaza ko Kiliziya ikomeza kwita ku kibazo cy’ibidukikije n’ubuzima bw’abantu, ashimangira ko kurengera isi ari inshingano ya buri wese.
Kuwa 4 Nyakanga, Papa Leo XIV azasura ikirwa cya Lampedusa, cyabaye inzira y’abimukira ibihumbi n’ibihumbi baturuka muri Afurika no mu Burasirazuba bwo Hagati berekeza i Burayi.
Azahura n’abimukira n’ababakiriye, atange ubutumwa bwo kubaho mu bumuntu no kudatererana abafite intege nke. Ibi bizaba bikurikira urugero rw’uwo yasimbuye, wasuye iki kirwa mu 2013 agashyira indabo mu nyanja mu rwego rwo kwibuka abahasize ubuzima.
Mu kwezi kwa Kanama, Papa azagaruka i Assisi kwizihiza imyaka 800 ishize Mutagatifu Fransisiko atabarutse, aho azahura n’urubyiruko anayobore Misa mu Ngoro ya Santa Maria degli Angeli.
Azasoreza uru rugendo rwe i Rimini, mu nama mpuzamahanga ya 47 yiswe Meeting for Friendship among Peoples, [Inama y’Ubuvandimwe] aho azahura n’abayitabiriye anasengere hamwe n’abakirisitu ba Diyosezi.
Uru rugendo rwa Papa Leo XIV rugaragaza icyerekezo cye cyo kuba hafi y’abababaye, gushimangira ubutumwa bw’impuhwe n’ubutabera, no kugaragaza ko Kiliziya ihora iri kumwe n’abayigana aho bari hose.
Ni urugendo kandi ruzibanda ku gusenga, ku butumwa bwo kwita ku bidukikije no ku kugaragariza isi ko ukwemera guherekezwa n’ibikorwa bifatika byo gufasha no guhumuriza.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
