Papa Leo XIV yashyize Myr Muteba, Arkiyepiskopi wa Lubumbashi, mu rwego rwa Vatikani rushinzwe guteza imbere iterambere ryuzuye rya muntu

Iri shyirwaho rije mu gihe Kiliziya Gatolika ikomeje gushimangira uruhare rwayo mu kwimakaza ubutabera, amahoro n’icyubahiro cy’ikiremwamuntu ku rwego rw’Isi.

Urwego rushinzwe Iterambere Ryuzuye rya Muntu rufite inshingano zo gukurikirana ibibazo birebana n’imibereho y’abantu, birimo ubutabera rusange, ubuzima, abimukira, ibikorwa by’urukundo n’ukwitangira abandi, ndetse no kurengera ibidukikije

Intego yarwo ni uguteza imbere iterambere ry’umuntu mu buryo bwuzuye, rishingiye ku Ivanjili no ku nyigisho mbonezamubano za Kiliziya.

Mu gushyira mu bikorwa izi nshingano, rukorana bya hafi n’Inama z’Abepiskopi zo hirya no hino ku Isi, hagamijwe gushyira mu bikorwa indangagaciro z’Ivanjili mu mibereho rusange, mu bukungu no muri politiki.

Uru rwego rwa Vatikani rwita cyane ku byiciro by’abantu bakeneye kwitabwaho byihariye, birimo abakennye, abarwayi, abatagira kivurira, abimukira n’impunzi, ndetse n’abahuye n’ingaruka z’intambara n’ibiza.

Runakurikirana ibibazo by’abafunzwe, abashomeri n’abahura n’ihohoterwa rishingiye ku bujura bw’abantu, ubucakara bwo muri iki gihe, iyicarubozo n’ibindi byibasira icyubahiro cy’ikiremwamuntu.

By’umwihariko, hari ishami ryihariye ryita ku bimukira n’impunzi, rikorera munsi y’ubuyobozi bwa Papa mu buryo bw’igihe runaka (ad tempus), rigamije gutanga ubufasha bwa gishumba bukenewe.

Uru rwego runagira uruhare mu guteza imbere no gusakaza inyigisho mbonezamubano za Kiliziya, rukusanya kandi rusesengura amakuru ajyanye n’uburenganzira bwa muntu, iterambere ry’abaturage, imiterere y’akazi, abimukira, icuruzwa ry’abantu n’ingaruka z’intambara ku baturage n’ibidukikije.

Rufasha kandi guhuza ibikorwa by’inzego za Kiliziya zitandukanye zishinzwe guteza imbere ubutabera n’amahoro, cyane cyane mu bihe by’ibibazo byihutirwa.

Byongeye kandi, rukorana n’imiryango itandukanye, irimo n’itari iya Kiliziya Gatolika, hagamijwe guteza imbere ubufatanye mu kubaka isi irangwa n’ubutabera n’imibereho myiza.

Ishyirwaho rya Musenyeri Fulgence Muteba Mugalu muri uru rwego rufite agaciro kanini, rikaba ari ikimenyetso cy’uruhare rukomeye Kiliziya yo muri Repubulika Iharanira Demokarasi ya Congo ikomeje kugira mu guharanira amahoro, ubumwe n’iterambere ryuzuye rya muntu.

Iki cyemezo cya Papa Leo XIV kigaragaza icyizere gikomeye afitiye abayobozi ba Kiliziya muri Afurika, by’umwihariko abo muri RDC, mu rugendo rwo kubaka isi irangwa n’ubutabera, amahoro n’iterambere rirambye.