Papa Leo XIV yasuye ibitaro bya Saint Paul i Douala, asabira abarwayi n’abaganga
Papa Leo XIV uri mu ruzinduko rwe rw’ubutumwa muri Afurika, kuri uyu wa 17 Mata 2026, yasuye ibitaro bya Kiliziya byitiriwe Mutagatifu Paul [Saint Paul Catholic Hospital] biherereye mu mujyi wa Douala, aho yahuye n’abarwayi, imiryango yabo ndetse n’abakozi bahakorera.
Uru ruzinduko rwabaye nyuma ya Misa Ntagatifu Papa yari amaze guturira muri uwo mujyi, rukaba rwari ruri mu bikorwa byari byateganyijwe mu ruzinduko rwe.
Ageze kuri ibi bitaro, Papa yabanje gufata umwanya wo gusengera muri chapelle y’ibi bitaro, nyuma agirana ibiganiro bigufi n’abaganga, abaforomo ndetse n’abarwayi bari mu gikari cy’ibitaro.
Mu butumwa yabagejejeho, yabagaragarije ko yifuza ko uru ruzinduko rwaba ikimenyetso cy’ihumure n’icyizere mu buzima bwabo, anabaha umugisha n’imiryango yabo.
Nyuma yo gusenga isengesho rya Dawe uri mu ijuru, Papa Leo XIV yakomeje azenguruka asura abarwayi mu byumba byabo, yita cyane ku bana n’abageze mu zabukuru, abagaragariza urukundo n’impuhwe.
Urwo ruzinduko rurangiye, Papa yahise yerekeza ku kibuga cy’indege kugira ngo asubire i Yaoundé, aho ateganyijwe guhura n’abanyeshuri n’abarimu bo muri Kaminuza Gatolika ya Afurika yo Hagati.
Kuri uyu wa Gatandatu, biteganyijwe ko Papa uruzinduko rwe rw’ubutumwa muri iki gihugu cya Cameroon azarusoreza ku kibuga cy’indege cya Yaoundé-Ville aho azaturira igitambo cya Misa, mbere yo gukomereza urugendo rwe muri Angola, mu gice cya gatatu cy’uruzinduko.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
