Papa Leo XIV yongeye guhamagarira Isi gusengera amahoro

Papa Leo XIV yabivuze mu gihe yakiraga Nyirubutungane Aram I, Umukuru wa Kiliziya y’Abanyarumeniya (Armenian Apostolic Church – See of Cilicia), wari witabiriye iyo nama rusange nyuma y’iminsi ibiri gusa ahuye na Papa i Vatikani bagasengera hamwe.

Mu ijambo rye Papa Leo XIV yagaragaje ibyishimo byo kwakira Aram I n’itsinda bari kumwe, ashimangira ko uruzinduko rwabo rufite uruhare rukomeye mu gukomeza umubano hagati ya za Kiliziya zombie.

Papa yagize ati "Nishimiye kwakira Nyirubutungane Aram I n’itsinda bari kumwe. Uru ruzinduko rwa kivandimwe ni amahirwe akomeye yo gukomeza umubano usanzwe uri hagati yacu, mu rugendo ruganisha ku bumwe busesuye hagati y’Amakiliziya yacu."

Yakomeje asabira umugisha urugendo rwa Aram I, abifuriza ko Roho Mutagatifu yakomeza kuruyobora.

Papa yagize ati "Ndahamagarira abari hano bose gusaba Imana n’umutima ukunze kugira ngo uru ruzinduko n’ibiganiro biri kurubamo bibe indi ntambwe ituganisha ku bumwe busesuye."

Nyuma y’ubu butumwa bwibanze ku mubano wa za Kiliziya, Papa Leo XIV yahise yibanda ku kibazo cy’amahoro mu bihugu byo mu Burasirazuba bwo Hagati, by’umwihariko Lebanon, avuga ko bikomeje gushegeshwa n’intambara n’urugomo.

Yagize ati "Turakomeze dusengere amahoro muri Lebanon no mu Burasirazuba bwo Hagati, ahakomeje kurangwa n’urugomo n’intambara."

Ku wa Mbere tariki ya 18 Gicurasi 2026, ubwo Papa Leo XIV yahuraga na Aram I mu Ngoro y’Intumwa i Vatikani, yari yamwijeje ko ahora asabira abaturage ba Lebanon ndetse na Kiliziya zo mu Burasirazuba bwo Hagati.

Muri iyo nama rusange kandi, Papa yashimiye Aram I ku ruhare rwe mu guteza imbere ubumwe n’imikoranire hagati ya Kiliziya, cyane cyane binyuze mu biganiro bya tewolojiya hagati ya Kiliziya Gatolika n’Amakiliziya ya Orthodox yo mu Burasirazuba.

Mu gusoza, Papa Leo XIV yifuje ko abatagatifu bakomeje kubera urugero Kiliziya bakomeza gusabira uru rugendo ruganisha ku bumwe bwifuzwa n’abakiristu.