Papa Lewo wa XIV yashyizeho Umwepiskopi mushya wa Diyosezi ya Bata muri Guinée équatoriale

Agizwe Umwepiskopi wa Bata mu gihe kitageze ku kwezi kumwe nyuma y’uruzinduko rwa gishumba rwa Pope Leo XIV muri iki gihugu, aho yasuye by’umwihariko umujyi wa Bata ndetse na gereza yaho, ashimangira ubutumwa bwo kwegera abakene n’abari mu bihe bikomeye.

Myr Miguel Angel Nguema Bee Etete yavutse ku wa 13 Nyakanga 1969. Yize filozofiya mu Ishuri rya Don Bosco Institute of Philosophy and Human Sciences riherereye i Lomé muri Togo, nyuma akomereza amasomo ya tewolojiya muri Theologicum Saint François de Sales i Lubumbashi muri Repubulika Iharanira Demokarasi ya Congo. Yanabonye impamyabumenyi y’icyiciro cya gatatu cya kaminuza mu bumenyi bw’uburezi muri Pontifical Salesian University i Roma mu Butaliyani.

Yahawe Ubupadiri ku wa 24 Nyakanga 2000. Ku wa 1 Mata 2017 ni bwo yagizwe Umwepiskopi wa Diyosezi ya Ebebiyin, ahabwa ubwepiskopi ku wa 20 Gicurasi uwo mwaka.

Kuva muri Ukuboza 2024, Musenyeri Nguema Bee Etete yari amaze igihe ayobora Diyosezi ya Bata nk’Umuyobozi w’agateganyo, nyuma y’isezera rya Musenyeri Juan Matogo Oyana wari ugiye mu kiruhuko cy’izabukuru.

Kugirwa Umwepiskopi wa Bata kwa Musenyeri Nguema Bee Etete bifatwa nk’intambwe ikomeye mu gukomeza umurimo wa gishumba muri iyi diyosezi ifite amateka akomeye muri Kiliziya Gatolika yo muri Guinée équatoriale. Bije kandi mu gihe abakristu bo muri Bata bagifite ibyishimo by’uruzinduko rwa vuba rwa Papa Leo XIV, rwashimangiye ukwiyegereza abakristu no kubahumuriza.

Diyosezi ya Bata ni imwe mu zikomeye muri Guinée équatoriale, ikaba ifite uruhare runini mu iyogezabutumwa no guteza imbere imibereho myiza y’abaturage muri iki gihugu cyo muri Afurika yo Hagati