Papa Lewo wa XIV yatangiye uruzinduko rw’iminsi 10 muri Afurika, Algeria ibimburira ibindi bihugu azasura

Indege imutwaye yahagurutse ku kibuga cy’indege cya Fiumicino Airport i Roma ku isaha ya saa tatu n’iminota itandatu za mu gitondo (9:06 AM), yerekeza ku kibuga cy’indege cya Houari Boumediene Airport mu murwa mukuru wa Algeria.

Mu ntangiriro z’uru rugendo ruzamara iminsi 10, Papa Leo XIV ateganya kumara iminsi ibiri muri Algeria, akaba ari bwo bwa mbere Umushumba wa Kiliziya Gatolika ku isi agiriye uruzinduko muri iki gihugu. Insanganyamatsiko nyamukuru ziyoboye uru ruzinduko zirimo amahoro, abimukira, kubungabunga ibidukikije, urubyiruko ndetse n’umuryango.

Mu gihe azamara muri Algeria, Papa Leo XIV azagirana ibiganiro n’abayobozi b’igihugu ndetse n’abagize umuryango w’aba-Agustini (Augustinians), asure kandi urwibutso rw’intambara ya Algeria . Ateganijwe no gusura urugo rwita ku bageze mu zabukuru ruyoborwa n’ababikira b’aba Little Sisters of the Poor, ndetse akanayobora igitambo cya Misa muri Bazilika ya Mutagatifu Augustini iri i Annaba.

Uru ruzinduko rufite igisobanuro cyihariye kuri Papa Leo wa XIV, kuko Algeria ari igihugu kirimo umujyi wa Annaba wahoze witwa Hippo, aho Mutagatifu Augustini yabereye Umwepiskopi kuva mu mwaka wa 395 kugeza atabarutse mu 430.

Si ubwa mbere Papa Leo wa XIV agiye ku mugabane wa Afurika, kuko mbere yo kuba Papa, igihe yari Umuyobozi Mukuru w’Umuryango wa Mutagatifu Augustini, icyo gihe akitwa Padiri Robert Prevost, yasuye ibihugu bitandukanye birimo Algeria, Kenya na Tanzania. By’umwihariko, Algeria yayigiyemo inshuro ebyiri mu 2001 no mu 2013.

Uru rugendo rufatwa nk’intambwe ikomeye mu gukomeza ubutumwa bwa Kiliziya Gatolika bwo kwimakaza amahoro, ubumwe n’iterambere ryuzuye ry’umuntu ku mugabane wa Afurika no ku isi muri rusange.