Papa Lewoni wa XIV yahaye Diyosezi ya Wote muri Kenya Umwepiskopi mushya, anashyiraho Umwepisikopi Wungirije wa Arkidiyosezi ya Abidjan muri Côte d’Ivoire

Aya makuru yatangajwe n’Ibiro Ntaramakuru bya Vatican ku wa Gatatu tariki ya 13 Gicurasi 2026.Muri Kenya, Musenyeri Simon Peter Kamomoe wari usanzwe ari Umwepisikopi Wungirije wa Arkidiyosezi ya Nairobi ndetse n’Umuyobozi wa Diyosezi ya Wote by’agateganyo (Apostolic Administrator), yagizwe ku mugaragaro Umushumba wa Diyosezi ya Wote.

Izi nshingano azihawe nyuma y’uko Papa yemeye ubwegure bwa Musenyeri Paul Kariuki Njiru ku wa 26 Werurwe 2026, kubera ibibazo by’ubuzima.Musenyeri Njiru, ufite imyaka 63, yagize ikibazo gikomeye cy’ubwonko (stroke) cyatumye atakaza ubushobozi bwo kuvuga. Nyuma yo kuva mu Buhinde aho yari yaragiye kwivuriza mu 2024, yakomeje gahunda yo gufata imiti no gukora imyitozo yo gusubiza umubiri mu buryo.

Musenyeri Kamomoe yavukiye muri Kenya mu Ugushyingo 1962, ahabwa Ubupadiri muri Kamena 1994 muri Arkidiyosezi ya Nairobi.Mu murimo we wa gishumba, yakoze inshingano zitandukanye zirimo kuyobora paruwasi, kuba umujyanama mu buyobozi bwa Arkidiyosezi ya Nairobi, ndetse no kuyobora ibikorwa by’iyogezabutumwa no kwita ku miryango.

Azwi cyane kubera umurimo yakoze muri Basilika Nto ya Holy Family kuva mu 2008, aho yanabaye umupadiri ushinzwe ikenurabushyo ry’umuryango.Muri Gashyantare 2024, Papa yamugize Umwepisikopi Wungirije wa Nairobi hamwe na Musenyeri Wallace Ng’ang’a Gachihi, aza guhabwa Ubwepisikopi muri Mata uwo mwaka.

Mu rwego rw’amashuri, Musenyeri Kamomoe afite ubumenyi buhambaye mu by’imitekerereze ya muntu n’ubujyanama, aho afite impamyabumenyi y’ikirenga (Doctorat) mu bijyanye n’ubujyanama mu by’imitekerereze (counselling psychology).

Diyosezi ya Wote yashinzwe mu 2023, ikaba ikorera mu Ntara ya Makueni muri Kenya. Imibare yo mu 2023 igaragaza ko ifite abakristu Gatolika 388,946 mu baturage bose 987,653, ikagira paruwasi 31.

Muri Côte d’Ivoire, Papa Leo XIV yagize Padiri Jean Martial Arnaud Kouamé Umwepisikopi Wungirije wa Arkidiyosezi ya Abidjan.Uyu mupadiri asanzwe ari Padiri Mukuru wa Paruwasi St. Ambroise Ma vigne, Ma Vie i Abidjan.Yavutse mu 1977, ahabwa Ubupadiri mu 2005 muri Arkidiyosezi ya Abidjan.

Nyuma yo guhabwa Ubupadiri, yatangiye umurimo muri Katedrali ya St. Paul mbere yo koherezwa mu Bufaransa, aho yahuje umurimo wa gishumba no gukomeza amashuri.

Padiri Kouamé afite ubumenyi mu mategeko ya Kiliziya (Canon Law), filozofiya, amateka na filozofiya ya siyansi, tewolojiya mboneragaciro, ndetse afite na Doctorat mu myitwarire n’indangagaciro (Ethics) yakuye muri Kaminuza ya Strasbourg.

Agarutse muri Côte d’Ivoire, yabaye Padiri Mukuru wa Paruwasi St. François Xavier d’Abobo kuva mu 2018 kugeza mu 2022, mbere yo guhabwa inshingano asanzweho ubu.Nk’Umwepisikopi Wungirije, azafasha Karidinali Ignace Bessi Dogbo mu kuyobora Arkidiyosezi ya Abidjan, igizwe na paruwasi 72, ifite abakristu Gatolika barenga miliyoni 2.6 mu baturage hafi miliyoni 4.

Izi mpinduka zigaragaza ko Papa Leo XIV akomeje gushyira imbere iyubahirizwa ry’inshingano za gishumba no gukomeza guha Kiliziya abayobozi bashya bashoboye gukomeza ubutumwa bwayo hirya no hino ku Isi.