Paruwasi ya Rutonde muri Arikidiyosezi ya Kigali yabereyemo bwa mbere ibirori by'itangwa ry'ubupadiri

Abaherewe ubupadiri bwa mbere muri paruwasi ya Rutonde ni: Diyakoni Jean Claude NTAKIYIMANA uvuka muri paruwasi ya Gihara muri diyosezi ya Kabgayi na Diyakoni Theoneste ZIRIMWABAGAGO, uvuka muri Paruwasi ya Rutonde. Ni umuhango wayobowe na Nyircyubahiro Antoine Karidinali KAMBANDA, unitabirwa n’abanyacyubahiro batandukanye barangajwe imbere na minisitiri w’Ubutegetsi bw’igihugu GATABAZI Jean Marie Vianney.

Mu byishimo byinshi abahawe ubupadiri bavuze ko ubupadiri bahawe atari ubwabo, ahubwo ari ubwa Yezu, na Kiliziya ye kuko ari we Musaseridoti mukuru, we ubatora mu bandi akabatuma. Bagaragaje ko bishimiye guhabwa ubupadiri mu gihe cya Sinodi bikazabafasha kurushaho kunga ubumwe n'abakristu, abapadiri n'umwepiskopi.

Mu butumwa yagejeje ku bitabiriye ibi birori, Nyiricyubahiro Antoni Karidinali KAMBANDA yavuze ko ari ibyishimo bikomeye kuba iri Sakaramentu ry’ubusaseridoti ritangiwe bwa mbere muri iyi Paruwasi. Ati "Iyo dutangiye iri Sakaramentu mu maparuwasi mashya imbere y’imbaga hari ubutumwa tuba dutanga cyane cyane mu bato no mu miryango yabo".

Minisitiri w’ubutegetsi bw’igihugu Jean Marie Vianney GATABAZI mu ijambo rye yabwiye abapadiri bashya ko bahisemo neza. Yasabye abapadiri bashya kuzafatanya na bagenzi babo guhangana n'ikibazo cy'amakimbirane mu miryango n'igwingira ry'abana.

Paruwasi ya Rutonde yitiriwe mutagatifu Yozefu yatangijwe tariki 26 Ugushyingo 2017, ibyarwa na paruwasi ya Shyorongi. Ubu igize abapadiri babiri bayivukamo ari bo Padiri Justin NSANZAMAHORO wabuherewe muri paruwasi ya Shyorongi na padiri Theoneste ZIRIMWABAGABO wabuhawe uyu munsi .