Perezida Nguema yagaragaje Uruzinduko rwa Papa Leo XIV muri Guinée équatoriale nk’“inkingi y’Ubukirisitu” muri Afurika yo Hagati

Mu ijambo yagejeje ku bayobozi, imiryango itari iya Leta ndetse n’abahagarariye ibihugu byabo, bari bateraniye ku Ngoro y’Umukuru w’Igihugu ku munsi wa mbere w’uruzinduko rwa Papa Leo wa XIV muri iki gihugu kuva ku wa 21 kugeza ku wa 23 Mata, Perezida Obiang yagaragaje ibyishimo n’ishema igihugu cye gitewe no kwakira Umushumba wa Kiliziya Gatolika ku isi ku nshuro ya mbere agiriye muri iki gihugu.

Yagize ati “Ni amahirwe akomeye ku baturage bacu kwakira Nyirubutungane Papa Leo XIV, tumwakiranye urugwiro muri iki gihugu cya Afurika. Twuzuye ibyishimo kandi twishimiye cyane kumucumbikira.”

Yakomeje agira ati “Twifurije Nyirubutungane Papa n’itsinda ryamuherekeje kuryoherwa no kwakirwa mu buryo bwacu bwa gakondo, no kumva bari iwabo mu gihe cyose bazamara hano.”

Perezida Obiang yagaragaje ko ukugera kwa Papa muri icyo gihugu ari isoko y’ibyishimo, imbabazi n’amahoro, kandi bikarushaho gushimangira ukwemera kwa gikristu mu gihugu cye.

Ati “Uku kuza kwa Papa kuri twe ni ikimenyetso cy’iyubahirizwa ry’ukwemera kwacu n’ubwitange bwacu nk’abakirisitu, cyane cyane muri iki gihe isi iri guhura n’ibibazo bya politiki, ubukungu n’umutekano muke.”

Perezida Obiang, uyoboye iki gihugu kuva mu Ukwakira 1982, yibukije ko Guinée équatoriale imaze imyaka irenga 170 mu bukirisitu, kandi ko abarenga 90% by’abaturage ari Abagatolika.

Ati “Ni muri urwo rwego uruzinduko rwa Nyirubutungane muri Repubulika ya Guinée équatoriale rushimangira ko igihugu cyacu ari inking ikomeye y’Ubukirisitu muri Afurika yo Hagati.”

Yanagarutse ku ruzinduko rw’amateka rwa Papa Mutagatifu Yohani Pawulo wa II mu 1982, avuga ko urwa Papa Leo XIV rukomeza uwo murage w’iyobokamana wagize uruhare rukomeye mu kubaka indangagaciro za gikristu muri iki gihugu.Ati “Twizeye ko nk’uko Papa Yohani Pawulo wa II yadushimangiye mu kwemera mu 1982, na Papa Leo XIV na we aje kongera kudukomeza mu kwizera kwacu.”

Perezida Obiang yagaragaje icyizere ko uru ruzinduko ruzazana imigisha mishya ku gihugu, rukarushaho gushimangira ukwemera mu gihe isi ihanganye n’ibibazo byinshi.

Yanashimiye cyane Papa Leo XIV kuba yarahisemo Guinée équatoriale nka kimwe mu bihugu bine agiriyemo urugendo rwa gishumba rw’iminsi 11 muri Afurika, harimo na Alijeriya, Kameruni na Angola.

Kuri uyu wa Gatatu, tariki ya 22 Mata, Papa Leo XIV ateganyijwe gusura Mongomo, aho aza gusomera Misa muri Bazilika yitiriwe Bikira Mariya Utasamanywe Icyaha, nyuma agasura ishuri ry’ikoranabuhanga ryitiriwe Papa Fransisiko.

Nyuma arakomereza i Bata, aho azasura gereza, asengere ku rwibutso rw’abahitanywe n’iturika ryabaye ku wa 7 Werurwe 2021, ndetse anahure n’urubyiruko n’imiryango kuri Stade ya Bata.

Uru ruzinduko rwa Papa muri Afurika ruzasozwa ku wa Kane, tariki ya 23 Mata 2026, aho azasomera Misa ya nyuma kuri Stade ya Malabo