RDB yashimye uruhare rwa Caritas ya Diyosezi Gatolika ya Cyangugu mu kubungabunga pariki y’igihugu ya Nyungwe

Ibi byashyizwe mu bikorwa na Caritas ya Diyosezi Gatolika ya Cyangugu ku bufatanye n’uturere twa Rusizi na Nyamasheke, mu rwego rwa gahunda yo gusaranganya inyungu ziva mu bukerarugendo (revenue sharing).

Mbabazi Marie Louise, umuyobozi ushinzwe guhuza abaturage na parike z’igihugu muri RDB, yashimye byimazeyo imikoranire na Caritas ya Cyangugu mu gushyira mu bikorwa iyi mishinga.

Yagize ati “Iyo tuvuga Caritas biba byandenze. Mukoresha neza amafaranga tubaha, ndetse rimwe na rimwe mukongeraho n’ayanyu kugira ngo abaturage bungukire kurushaho. Ku bwange nifuza ko imishinga yose y’iyi gahunda yo gusaranganya inyungu ziva mu bukerarugendo mu gihugu cyose yajya ishyirwa mu bikorwa na Caritas, kuko iyo Caritas iri mu bikorwa, nta kibazo kiba gihari, natwe turaryama tugasinzira.”

Padiri Irakoze Hyacinthe, wari umuyobozi wa Caritas ya Cyangugu,yashimangiye ko ibi bikorwa bitagamije inyungu z’ubucuruzi ahubwo ari ugusohoza ubutumwa bwa Caritas.

Yagize ati “Twebwe nka Caritas icyo twungukiramo ni ukusohoza ubutumwa bwacu. Muri misiyo ya Caritas harimo iterambere ry’abaturage, iterambere ry’aho batuye n’ubuzima bwabo. Amafaranga duhabwa na RDB tuyakoresha neza kugira ngo agere ku baturage, ntabwo tubikora tugamije inyungu ahubwo tubikora hagamijwe iterambere ry’abaturage.”

Yanibukije abaturage ko kubungabunga Pariki ya Nyungwe ari isoko y’iterambere ryabo “Pariki ya Nyungwe si igihuru gisanzwe, ni ikigega cy’amafaranga dukesha ubukerarugendo. Mugomba kuyibungabunga mwirinda kuyitemamo ibiti, kuyitwika cyangwa kwica inyamaswa zirimo.”

Bamwe mu baturage bahawe inzu bavuga ko ubu bagize ikerekezo gishya k’imibereho kandi bagiye kugira uruhare mu kurinda Pariki ya Nyungwe.

Ngurinzira Jean Marie, ufite ubumuga,yagize ati “Mu buzima bwanjye sinari niteze kuzashobora kwiyubakira bitewe n’uko nagize impanuka. Nshimishijwe no kuba Caritas yampaye inzu, abana banjye batandatu bakazakurira ahantu heza.”

Nyirahavugimana Beatrice nawe yongeyeho ati “Nta muntu uzongera kuyangiza kuko iyo iyi pariki ya nyungwe itahaba, natwe ntituba tubonye izi nzu. Ubu n’uwashaka kuyitemamo igiti nzahita mbibwira ubuyobozi.”

Ku ruhande rw’ubuyobozi, Habimana Emmanuel, Umunyamabanga Nshingwabikorwa w’Umurenge wa Nkungu, yavuze ko kubakira abaturage byagabanyije cyane ibikorwa byo kwangiza ishyamba rya Cyamudongo.

Ati “Mbere abaturage bajyagamo gutema ibiti byo kubakisha, ariko ubu bari mu nzu nziza, ntawe uzongera kujya gushaka ibiti muri pariki.”

Mu bikorwa byatashywe harimo Inzu 22 zubakiwe imiryango 32 y’abasigajwe inyuma n’amateka mu murenge wa Nkungu, hafi y’ishyamba rya Cyamudongo ryahinduwe agashami ka Pariki ya Nyungwe. Isoko rya Karambi mu karere ka Nyamasheke, ryuzuye ritwaye asaga miliyoni 94 Frw. Inzu 21 n’Urugo Mbonezamikurire (ECD) byubakiwe imiryango 26 mu murenge wa Ruharambuga, Nyamasheke, byose bikaba byaratwaye asaga miliyoni 219 Frw. Muri rusange, yose yatanzwe na RDB, iyaha uturere twa Rusizi na Nyamasheke hanyuma ishyirwa mu bikorwa rikorwa na Caritas ya Diyosezi Gatolika ya Cyangugu.