RDC: Inama y’Abepiskopi yanyomoje amakuru y’urupfu rwa Myr Ngona wa Diyosezi ya Wamba

Kuwa 30 Werurwe 2026 ni bwo aya makuru y’ibinyoma yakwirakwizwaga hifashishijwe ifoto yashyizweho amagambo agaragaza ko uyu mushumba wa Kiliziya yaba yaraguye mu gitero cyagabwe n’umutwe witwaje intwaro wa ADF mu muhanda Bunia–Mambasa.

Kuwa 30 Werurwe 2026 ni bwo aya makuru y’ibinyoma yakwirakwizwaga hifashishijwe ifoto yashyizweho amagambo agaragaza ko uyu mushumba wa Kiliziya yaba yaraguye mu gitero cyagabwe n’umutwe witwaje intwaro wa ADF mu muhanda Bunia–Mambasa.

Mu itangazo ryashyizwe ahagaragara binyuze ku mbuga nkoranyambaga za CENCO, iyi Nama y’Abepiskopi yahakanye yivuye inyuma ayo makuru, ivuga ko nta shingiro afite, ishimangira ko Musenyeri Emmanuel Ngona Ngotsi ari muzima kandi nta kibazo na kimwe yagize.

Padiri Guy Masieta, ushinzwe itumanaho muri CENCO, yemeje ko Musenyeri Ngona akiri muzima kandi ari mu gihugu, agira ati “Aya ni amakuru y’ibinyoma. Musenyeri Ngona ntiyapfuye, aracyari muzima. Ni we Mwepiskopi watowe wa Diyosezi ya Wamba kandi aracyariho. Ubu ari i Kinshasa, kandi nta rwego rwemewe rwemeje ko yapfuye.”

CENCO yasabye abakristu n’abandi bose kwirinda gukwirakwiza amakuru atagenzuwe, cyane cyane ayerekeye ubuzima bw’abantu, kuko ashobora guteza urujijo n’ubwoba mu muryango mugari w’abemera ndetse no muri sosiyete muri rusange.

Amakuru y’ibihuha yari yakwirakwijwe yavugaga ko Musenyeri Ngona Ngotsi yapfiriye mu mpanuka y’imodoka ku muhanda Bunia–Mambasa, nyuma y’ibitero by’imitwe yitwaje intwaro, ariko CENCO yashimangiye ko ayo makuru atari ukuri.

Perezida wa CENCO, Nyiricyubahiro Musenyeri Fulgence Muteba Mugalu, na we yagize ati “Nta makuru y’ukuri ashobora kwemeza urupfu rwe. Turasaba abaturage gukomeza kugira amakenga no kudakurikira ibihuha nk’ibi.”

Inama y’Abepiskopi Gatolika yibukije kandi abakristu ko gukwirakwiza amakuru atari yo bishobora guteza urujijo no gutera impungenge mu muryango. Yashimangiye ko ari ngombwa gusuzuma neza amakuru mbere yo kuyasangiza abandi no kwishingikiriza ku nzira zemewe n’inzego zizewe za Kiliziya.

Abepiskopi basabye ko kurwanya ibihuha ari inshingano rusange, cyane cyane muri iki gihe imbuga nkoranyambaga zorohereza ikwirakwizwa ry’amakuru adafite gihamya. Banasabye abakristu ba Diyosezi ya Wamba n’Abanyekongo bose gukurikira gusa imiyoboro yemewe na Kiliziya mu bijyanye n’amakuru y’abayobozi babo.