Ruhango: Abarezi n'abanyeshuri ba Saint Joseph TSS Nzuki bishimira ko Inteko y’Umuco yashyize amarushanwa y’Igisoro mu mashuri

Ibi babigarutseho mu gihe kuri uyu wa 20 Gicurasi 2026, Rwanda rwizihijeho Umunsi Mpuzamahanga w’Ingoro z’Umurage, wizihirijwe ku Ngoro y’Ubugeni n’Ubuhanzi i Kanombe mu Mujyi wa Kigali, mu nsanganyamatsiko igira iti “Uruhare rw’Ingoro z’Umurage mu ihererekanyamuco.”

Muri uwo munsi kandi habereye amarushanwa y’umukino w’Igisoro ku rwego rw’Igihugu yahuje abanyeshuri bo mu mashuri yisumbuye n’ay’ubumenyingiro, aho Saint Joseph TSS Nzuki yari ihagarariwe n’umunyeshuri Igiraneza Serge wiga mu mwaka wa gatandatu mu ishami ry’Ubukanishi bw’Ibinyabiziga (Automobile Technology), wari uhagarariye Intara y’Amajyepfo nyuma yo kuba uwa mbere ku rwego rw’iyo ntara.

Aya marushanwa y’Igisoro mu mashuri yisumbuye n’ay’ubumenyingiro yatangijwe ku mugaragaro ku wa 04 Gicurasi 2026 ku Ngoro y’Ubugeni n’Ubuhanzi i Kanombe.

Ubwo yatangizaga iki gikorwa, Umuyobozi Mukuru w’Inteko y’Umuco, Amb. Robert Masozera, yavuze ko umukino w’Igisoro atari umukino usanzwe ahubwo ari igikoresho cy’uburezi n’ubwenge kigamije gusubiza urubyiruko ku muco n’imizi yarwo.

Yagize ati“Umukino w’Igisoro ntabwo ari umukino gusa ahubwo ni ishuri ririmo ubwenge. Ni ishuri ryigisha gutekereza neza, ni ishuri ryigisha gufata ibyemezo kandi ni ishuri ririmo indangagaciro.”

Yakomeje agaragaza ko Inteko y’Umuco igamije gusigasira umurage no kuwusubiza mu buzima bw’abaturage, cyane cyane urubyiruko.

Ati“Ibi ntimubifate nk’umukino gusa ahubwo mubifate nk’ibirenzeho. Twebwe nk’Inteko y’Umuco turashaka kugarura umurage tukawuha ubuzima. Turifuza kuziba icyuho kiri hagati y’u Rwanda rw’ubu n’imizi yarwo.”

Mu marushanwa y’Igisoro ku rwego rw’igihugu yabereye i Kanombe ku Ngoro y’Ubugeni n’Ubuhanzi kuri uyu wa 19-20 Gicurasi 2026, Igiraneza Serge yitwaye neza ahagarariye Intara y’Amajyepfo nyuma yo gutsinda ku rwego rw’intara. Ubu akaba yaje ku mwanya wa gatatu ku rwego rw’igihugu.

Yatangiye urugendo rwe ku rwego rw’ishuri, akomeza ku rwego rw’intara, kugeza ageze ku rwego rw’igihugu, aho yagaragaje ubuhanga mu gutekereza no gukina vuba.

Manasse Uwiringiyimana, umurezi muri Saint Joseph TSS Nzuki ukurikirana umukino w’Igisoro, yavuze ko bishimira uburyo Inteko y’Umuco yagaruye uyu mukino mu mashuri.

Yagize ati“Turashimira Inteko y’Umuco kuba yarashyizeho aya marushanwa. Byatangiye ku rwego rw’ishuri, dukomeza ku rwego rw’intara, none tugeze ku rwego rw’igihugu. Ni intambwe ikomeye mu guteza imbere impano z’abanyeshuri.”

Yakomeje avuga ko hari ubufatanye buri hagati y'Inteko y’Umuco, Minisiteri y’Uburezi na Jimilage y’Abadage mu guteza imbere uyu mukino mu mashuri.

Igiraneza Serge wegukanye umwanya wa Gatatu ku rwego rw’igihugu, yavuze ko umukino w’Igisoro wamufashije mu masomo ye n’ubuzima bwa buri munsi.Yagize ati“Igisoro kiranshimisha cyane kuko gituma ntekereza vuba kandi nkareba kure. Kimfasha no mu masomo y’Ubukanishi bw’Ibinyabiziga.”

Yasoje yishimira ko yabashije guhagararira intara y’Amajyepfo kandi akaba yegukanye umwanya wa gatatu ku rwego rw’igihugu

Abanyeshuri n’abarezi ba Saint Joseph TSS Nzuki bavuga ko gushyira umukino w’Igisoro mu marushanwa y’igihugu ari intambwe ikomeye mu gusigasira umuco nyarwanda no guteza imbere urubyiruko, bakemeza ko ari uburyo bwo kubaka ubumenyi, ubusabane n’ubushobozi bwo gutekereza.

Bashimangira ko iyi gahunda ari intangiriro y’ahazaza heza h’imikino gakondo mu mashuri y’u Rwanda, aho Igisoro gikomeje kuba igikoresho cy’uburezi n’umuco gifasha gusubiza urubyiruko ku mizi yarwo no kubaka ejo hazaza harwo