SECAM yamaganye ihohoterwa rikorerwa abanyamahanga muri Afurika y’Epfo, isaba ubuyobozi gufata ingamba zihamye

Mu itangazo ryashyizwe ahagaragara kuri uyu wa O5 Gicurasi 2026, ryashyizweho umukono na Perezida wa SECAM, Fridolin Karidinali Ambongo, akaba na Arikiyepiskopi wa Kinshasa, iri huriro ryamaganye byimazeyo ibikorwa by’urugomo bifitanye isano n’ivangura rishingiye ku kuba umuntu ari umunyamahanga, rinagaragaza ko bihabanye n’indangagaciro z’ubumuntu n’ubuvandimwe bw’Abanyafurika.

SECAM yagaragaje ko yifatanyije n’Inama y’Abepisikopi Gatolika yo mu majyepfo ya Afurika, {Southern African Catholic Bishops’ Conference}, ku ruhande rwayo mu kurengera abimukira bahohoterwa, inihanganisha imiryango y’abahuye n’ibi bikorwa by’urugomo.

SECAM yanibukije ko umuntu wese yaremwe mu ishusho y’Imana, bityo agomba kubahwa hatitawe ku gihugu akomokamo, ubwoko cyangwa umuco we. Inavuga ko ihohoterwa rikorerwa abanyamahanga ari ugutesha agaciro ubumuntu no gutesha agaciro ihame ry’ubuvandimwe rusange.

SECAM yanagaragaje ko nubwo ibihugu bifite uburenganzira bwo kurinda ubusugire bwabyo, abimukira na bo bagomba kubahiriza amategeko n’umuco by’igihugu bakiriyemo. Ibi ngo bigomba kujyana no kubaha uburenganzira bwabo nk’abantu.

Yongeyeho ko ibikorwa by’urugomo byagaragaye muri Afurika y’Epfo binyuranyije n’amategeko mpuzamahanga arengera uburenganzira bwa muntu, cyane cyane African Charter on Human and Peoples’ Rights, irengera uburenganzira bwo kubaho, agaciro ka muntu, umutekano n’uburinganire imbere y’amategeko.

SECAM yasabye Guverinoma ya Afurika y’Epfo gufata ingamba zihuse kandi zirambye zo kurinda abantu bose batuye ku butaka bwayo, gukora iperereza ridafite aho ribogamiye, no gukurikirana ababigizemo uruhare, ndetse no guhagarika ibikorwa byo kwihanira.

SECAM kandi yasabye Umuryango w’Ubumwe bw’Afurika kugira uruhare rufatika mu gukumira no kurwanya ihohoterwa rishingiye ku ivangura, no gushyiraho uburyo bwo gutahura hakiri kare ibibazo bishobora guteza umutekano muke.

SECAM yahamagariye Abanyafurika bose kwanga urwango, amagambo acamo abantu ibice, no guteza imbere umuco w’ibiganiro, kubahana no gufatana nk’abavandimwe. Yashimangiye ko umunyamahanga adakwiye gufatwa nk’umwanzi, ahubwo nk’umuvandimwe ukeneye kurengerwa.

Iri tangazo risohotse nyuma y’iminsi ishize, ibikorwa by’urugomo bigaragara muri Afurika y’Epfo, aho bamwe mu baturage bagabye ibitero ku banyamahanga baturutse mu bindi bihugu bya Afurika, babashinja kubatwara akazi kagakozwe n’abenegihugu, no guteza umutekano muke. Ibyo bikorwa byatumye hari abahasize ubuzima, abandi barakomereka, ndetse n’imitungo irangirika.

Amatsinda y’aba bantu adashaka abanyamahanga, amaze iminsi ababuza kujya mu bitaro mu mashuri no gushaka izindi serivisi, abanyamahanga bagasabwa ibyangombwa.

SECAM yijeje abahuye n’ihohoterwa ko Kiliziya izakomeza kubaba hafi mu buryo bwa Roho n’ubufasha, ibibutsa ko batari bonyine.