Sudani y’Epfo: Kiliziya yongeye gusaba ko haboneka ukuri ku ibura rya Padiri Yugue n’umushoferi bamaze imyaka itatu baburiwe irengero

Aba bagabo bombi babuze ku wa 27 Mata 2024, ubwo bari mu rugendo rw’iyogezabutumwa bavuye muri Paruwasi ya Nazareti Nagero berekeza i Tombura. Kuva icyo gihe, nta makuru arambuye aramenyekana ku byababayeho.

Mu ibaruwa yasohotse kuri uyu wa 27 Mata 2026, Umwepiskopi wa Diyosezi ya Tombura-Yambio, Edward Hiiboro Kussala, yagaragaje agahinda gakomeye Diyosezi ikomeje guterwa n’iri bura.

Yagize ati “Uyu munsi ni imyaka itatu ishize tubuze Padiri Luke Yugue na Michael Gbeko. Ni imyaka itatu twishwe n’ikiniga, imyaka itatu y’ibibazo bitagira ibisubizo, imyaka itatu y’igikomere cyanze gukira.”

Yongeyeho ko n’ubwo igihe cyagenda, ibyifuzo byo kumenya ukuri bikiriho, ati“Amatwi n’amaso yacu bikiri ku muhanda, dutegereje kumenya ukuri ku bavandimwe bacu babuze. Igihe cyarashize, ariko ibibazo n’agahinda ntibyashize.”

Musenyeri Hiiboro yavuze ko aba babuze batari ab’imiryango yabo gusa, ahubwo ari igihombo ku gihugu cyose.Ati“Padiri Luke yari umugaragu w’Inkuru Nziza, wiyeguriye ubutumwa bwa Kristu bwo kunga ubumwe, amahoro n’icyizere. Michael Gbeko na we yari umufatanyabikorwa wizerwa. Ku burirwa irengero kwabo si igihombo cy’imiryango yabo gusa, ni igikomere cy’igihugu, ni n’ikigeragezo ku muryango mugari... (sosiyete).”

Uyu mushumba wa Kiliziya yongeye gusaba inzego z’igihugu gukora inshingano zazo, zigatanga amakuru ku byabaye, ndetse hagatangwa ubutabera. Ati“Turacyabashakisha… turacyasaba ukuri… turacyakeneye ubutabera. Turasaba ubuyobozi gukora ibikwiye. Ubutegetsi si imbaraga gusa, ni inshingano imbere y’Imana n’amateka.”

Musenyeri Hiiboro yagaragaje ko ikibazo cy’abantu baburirwa irengero muri Sudani y’Epfo gikomeje gufata indi ntera, aho imiryango myinshi ibabaye itazi irengero ry’abayo.Yagize ati “Si aba gusa babuze. Hari benshi muri Sudani y’Epfo baburiwe irengero, ubuzima bugafatwa nk’ubudafite agaciro. Imiryango myinshi iracyarira mu mutuzo, ariko amarira yabo agaragara imbere y’Imana.”

Yihanganishije imiryango yabuze ababo, ayizeza ko Kiliziya iri kumwe na yo mu isengesho no mu bubabare. Ati “Ntimuri mwenyine. Kiliziya iri kumwe namwe. Dufatanyije namwe ububabare, kandi turacyafite icyizere.”

Yanasabye Abakristu bose gusenga basabira: ukuri ku baburiwe irengero, ubutabera, amahoro mu gihugu no guhumuriza imitima yakomeretse.

Myr Hiiboro yasabye ko buri mwaka ku itariki aba baburiyeho hazajya habaho Misa zibibuka, zisabira bo n’abandi bose baburiwe irengero muri Sudani y’Epfo.

Yasoje ashimangira ko ukuri kutazahishwa burundu. Ati“Ntituzemera ko kwibuka kugenda kuzima. Ukuri ntikuzahambwa. Ubutabera ntibuzahora bwirengagizwa iteka.”