Sudani Yepfo: Myr Hiiboro arahamagarira abakristu guhindura igisibo igihe cyo gusana umubano mu gihugu cyugarijwe n’umutekano muke

Ibi Myr Eduardo Hiiboro Kussala yabigarutseho ku wa Gatatu w’Ivu, tariki ya 18 Gashyantare 2026, agaragaza ko Diyosezi ayoboye ihanganye n’ibibazo bikomeye birimo urwango, ivangura rishingiye ku moko, gushora urubyiruko mu bikorwa bibi, ubuhemu, ihohoterwa rigambiriwe, gutandukana kw’abashakanye ku gahato, ubukene n’indwara zibasiye abaturage.

Musenyeri Hiiboro yashimangiye akamaro ko kwiyiriza ubusa hagamijwe amahoro, ubutabera n’ubufatanye. Yasabye kwiyiriza uburakari, urwango n’amazimwe, ndetse no kugabanya ibirenze kugira ngo bizafashe imfubyi, abapfakazi n’indi miryango itishoboye.

Yagize ati “Mu gihe twinjira mu Gisibo gitagatifu cya 2026, turi guhura n’ibibazo byinshi. Ariko Igisibo ni igihe cyo kwihana, gukira no kongera kugira icyizere.”

Insanganyamatsiko y’uyu mwaka igira iti “Nimugarukire Uhoraho mubone kubaho mu mahoro”, Musenyeri Hiiboro asobanura ko Abakristu bose bahamagarirwa kugarukira Imana, gusana umubano no kubaka imiryango ishingiye ku bumwe n’ubwiyunge.

Yasabye paruwasi zose, imiryango ndetse n’amatsinda mato y’Abakristu kwitabira igisibo mu buryo bufatika, bakusanya ubushobozi bwose bushoboka — bw’umubiri, bwa roho n’ubw’umutungo hagamijwe gufasha abatishoboye no kugarurira igihugu icyubahiro n’icyizere.

Myr Hiiboro yasabye Abakristu kwitoza umuco uganisha ku kwivugurura kuri roho. Mu byo yasabye harimo kwirinda inzoga n’ibiyobyabwenge, itabi, imvugo zibabaza, urwango rushingiye ku moko, ubuhemu na ruswa. Yasabye kandi kwirinda ihohoterwa ryo mu ngo n’akarengane, no kwimenyereza kwifata mu byerekeye imirire, imikoreshereze y’itangazamakuru n’imyitwarire rusange.

Yatanze igitekerezo cy’uko buri mukristu yahitamo “ingeso mbi imwe yo kureka n’ingeso nziza imwe yo kwimakaza buri munsi.” Abakristu bashishikarijwe kandi gutegura umwambaro woroheje cyangwa agatambaro ko guhabwa umugisha n’umupadiri, bikazabibutsa isuku y’umutima, ukwifata no guharanira ubuzima butagatifu bushingiye ku isezerano rya Batisimu.

Abakristu barasabwa gukora ingendo nyobokamana bagasengera amahoro n’ubwiyunge, gukira ihungabana n’indwara, ndetse n’ibyifuzo bya Papa Leo XIV.

Abapadiri basabwe gutegura inyigisho za buri cyumweru ku kwihana, imbabazi, amahoro n’icyizere. Hazanategurwa Umunsi wa Diyosezi w’Ubwiyunge, uzarangwa n’isengesho rusange ryo gusaba imbabazi, guhuza imiryango n’amoko, gucana buji z’amahoro no gusoma Ijambo ry’Imana ku bumwe.

Yatangije kandi gahunda yiswe ““Gufasha Umuryango Utishoboye” aho paruwasi n’Amatsinda mato y’Abakristu bazajya bafata mu nshingano umuryango umwe cyangwa myinshi itishoboye, bakawufashisha ibiribwa, ibikoresho by’ishuri ku bana no kuwusura bawusabira.

Mu bindi bikorwa biteganyijwe harimo kuramya Yezu mu Isakaramentu Ritagatifu buri cyumweru hagamijwe gusabira gukira no gusana imiryango, gusabira ingo (nk’isengesho rya Rozari ya buri munsi), no gutegura inyigisho zihariye z’urubyiruko.

Hatangijwe kandi ubukangurambaga bwiswe “Garukira Data” bugamije kongera amasaha yo kwakira abashaka kwiyunga n’Imana mu Isakaramentu rya Penetensiya mbere ya Pasika.

Mu turere Diyosezi ikoreramo hazabera urugendo rw’amahoro rugamije guhamya ku mugaragaro icyifuzo cy’ubumwe no gutagatifuza imitima, hakabaho na Misa yo gusabira abakorewe ihohoterwa, abarwayi n’abahuye n’ihungabana, harimo n’isigwa ry’abarwayi n’isengesho ryo gusabira imiryango n’abashakanye bagatana gusubirana.

Musenyeri Hiiboro yagaragaje icyizere ko iyi gahunda izagabanya imvugo z’urwango n’amacakubiri ashingiye ku moko, igakomeza ubumwe bw’imiryango n’inyigisho z’urubyiruko, ndetse igakusanya ubushobozi bwo gufasha abatishoboye.

Yasoje yibutsa abakristu ko“Igisibo si igihe cyo kwiyiriza gusa, ahubwo ni igihe cyo kongera kuvuka ku buryo bwa roho, gufata inshingano mu mibereho rusange no gukira nk’umuryango. Buri paruwasi, buri muryango na buri muntu ku giti cye nibiyemeze kugarukira Imana, kugarura amahoro no gushyigikira abatishoboye.”