Turi mu isi y’ibitangazamakuru byigisha kurwanya Imana: Umukristu agomba kugira umutima uhamye” – Mgr Musengamana

Umwepiskopi wa Byumba yibukije ko itangazamakuru rigezweho rikomeje guhabwa urubuga rwo kwamamaza ibikorwa binyuranye, rimwe na rimwe birwanya Imana, Kiliziya n’abayoboke bayo.

Yagize ati“Turi mu isi aho twumva kandi tukabona ibitangazamakuru bitandukanye bihabwa rugari ndetse bikanashishikarizwa kwamamaza gahunda yo kurwanya Imana, Kiliziya, abayoboke bayo n’ibyayo.”

Mgr Musengamana yagarutse ku kamaro ko kugira umutima uhamye, atagushwa n’ibitekerezo binyuranye n’Ijambo ry’Imana cyane cyane ibiri gukwirakwizwa n'itangazamakuru rigezweho, avuga ko umukristu wo muri iki gihe agomba kwizirika ku Ijambo ry’Imana no guhamya ukwemera mu bikorwa bya buri munsi.

Mu nyigisho ye, Umwepiskopi yagarutse ku bibazo Isi n’abakristu bahura nabyo muri iki gihe, asobanura ko abantu benshi bagenda bicika ku kwemera bagendera ku bitekerezo byabo aho kumvira Ijambo ry’Imana.

Yagize ati “Bakristu bavandimwe, balayiki, turi guhimbaza yubile y’impurirane mu bihe bitoroshye by’amateka y’Isi na Kiliziya yacu. Turi mu bihe by’impinduka mu myumvire, imibereho n’imikorere y’abantu igenda igaragaza guhakana, kurwanya no gutera umugongo Imana n’ibyayo.”

Musenyeri Musengamana yasoje inyigisho ye ashimangira ko ubukristu nyabwo butagarukira ku izina gusa, ahubwo ari ubuhamya bwa buri munsi mu bikorwa n’imyifatire. Yongeraho ko iyi Yubile y’impurirane igomba kuba umwanya wo kwisuzuma no gusubiza amaso ku bushobozi bw’umukristu bwo kuba urumuri n’umunyu muri sosiyete yugarijwe n’ivangura n’ubuhakanyi.