U Burundi bwifatanyije n’u Rwanda mu byishimo bya Yubile y’imyaka 125 y’Ivangili mu Rwanda

Mu izina ry’Inama y’Abepiskopi Gatolika mu Burundi, haje intumwa zirimo Abepiskopi babiri, zikaba zari ziyobowe na Nyiricyubahiro Musenyeri Salvator Niciteretse, Umushumba wa Diyosezi ya Bururi. Bari kumwe n’abalayiki batanu, abiyeguriyimana batatu n’abapadiri batatu, baje kwifatanya na Kiliziya Gatolika mu Rwanda mu gusoza Yubile y’Impurirane y’imyaka 124 Ivanjili igeze mu Rwanda n’iy’imyaka 2025 Kristu acunguye isi no gusangira ibyishimo by’amateka y’iyogezabutumwa.

Mu butumwa bwe, Musenyeri Niciteretse yagaragaje ko aya mateka ahuza ibihugu byombi ari umugisha n'umurage ukwiye guhora wibukwa no gushimwa

Mu butumwa kandi bushimangira ubu bumwe,Mgr Niciteretse yagize ati“Bwana Minisitiri w’Intebe, Bepiskopi mwese dusangiye ubutumwa, Banyacyubahiro bayobozi muri hano, basaseridoti, abiyeguriye Imana n’abandi bose muri hano mu cyubahiro cyanyu: duhimbazwe na Kristu.”

Yakomeje agira ati “Turifurizanya Yubile nziza y’Impurirane. Tubanze kubagezaho indamutso y’Abepiskopi b’u Burundi hamwe n’abakirisitu b’igihugu cy’Imana mu Burundi, ubu bari hamwe i Bujumbura bahimbaza Yubile y’imyaka 100 ishize hatowe abasaserdoti ba mbere b’Abarundi.”

Mgr Niciteretse yashimiye Kiliziya Gatolika mu Rwanda ku bwo kohereza Umwepiskopi wa Kibungo mu birori byo kwizihiza Yubile y’imyaka 100 u Burundi bubonye umupadiri wa mbere

Yakomeje agira ati “ Twongera kandi gushimira Kiliziya Gatolika mu Rwanda ko yohereje intumwa zirangajwe imbere na Nyiricyubahiro Umwepiskopi wa Kibungo, kugira ngo zifatanye natwe muri uyu munsi mukuru w’amateka.”

Yasobanuriye Abakirisitu ko iki gikorwa kitari icy’umuhango gusa, ahubwo cyari icyo gusubiza amaso inyuma no kugenzura intambwe y’ukwemera ati “Hari byinshi twashimira Imana byagezweho kubera ukwemera Umwana w’Imana: ibiboneka n’ibitaboneka. Nubwo hari ibyababaje mu mateka, Kiliziya yahuje imitima ya benshi, yita ku mibereho mu kubaka amashuri, amavuriro, ibigo byita ku bafite ubumuga n’imfubyi, no guharanira kunga abantu no kubabarirana. Ntihanirengagijwe n’uruhare mu iterambere.”

Yibukije ko Yubile ari igihe cyo kwisubizamo imbaraga n’ukwiyegurira Imana. Ati “Yubile itwibutsa aho twavuye, aho tugeze n’aho tugomba kugana. Nta terambere dushobora kugeraho tudafatanye n’uyu Mwana w’Imana, tutamushyize imbere mu mibereho yacu.”

Mgr Niciteretse yongeyeho ko “Nta gihombo mu kwemera Yezu Kristu no gukorera Imana yigaragaje muri we. Nitegereza iby’isi n’akarere kacu, nkabona ko nitutagaruka twese tugafatanya n’uyu Mwana w’Imana waduhaye urukundo rutizigama, nk’uko tubisoma muri Yohani 15,13, tugahinduka umwe, isi izakomeza kugira ibyago.”

Yasoje agira ati “Mbifurije Yubile nziza y’Impurirane. Nyina wa Jambo ababe hafi mu mibereho yanyu yose. Mutere imbere kandi mugire amahoro ya Kristu.”

Uretse abaturutse mu Burundi, ibirori byitabiriwe n'abepiskopi batatu bo muri Tanzania, umwe wo muri Repubulika Iharanira Demokarasi ya Kongo, ndetse n’Umwepiskopi wo muri Autriche. Byari ikimenyetso cy’uko iyogezabutumwa mu Rwanda ritabaye iry’abanyarwanda bonyine, ahubwo rishingiye ku bufatanye bwo mu karere n’umurage w’umuryango mugari wa Kiliziya.

Mu ijambo rye, Nyiricyubahiro Antoine Karidinali Kambanda, Arkiyepiskopi wa Kigali akaba na Perezida w’Inama y’Abepiskopi Gatolika mu Rwanda, yashimiye abakirisitu n’abashyitsi baturutse hanze, cyane cyane abo mu Burundi na Tanzania, kubwo kwifatanya n’u Rwanda mu byishimo bya Yubile y’Impurirane.

Agaruka ku mateka y’ivanjili yageze mu Rwanda inyuze mu Burundi na Tanzania, yagize ati “Abamisiyoneri ba mbere bari bayobowe na Mgr Hiriti, baje boherejwe na Papa Leo wa XIII. Bahagurukiye Katoke muri Tanzania, icyo gihe bari muri Diyosezi ya Bukoba. Twagize amahirwe kuba turi kumwe n’Umwepiskopi wa Bukoba waje kwifatanya natwe. Bavuye muri Tanzania banyura mu Burundi baza mu Rwanda. Ubu tukaba twishimiye ko turi kumwe n’Abepiskopi b’u Burundi.”

Mu gusoza ijambo rye, Karidinali Kambanda yashimangiye ko aya mateka ahuza umutima n’imibereho y’ivanjili mu karere

Ati “Murumva rero ko aba bashyitsi ari abantu dusangiye amateka y’iyogezabutumwa mu karere kacu. Twishimiye ko mwashoboye kuza kwifatanya natwe muri ibyo byishimo.”

Ibirori byo gusoza Yubile y’Impurirane byahurije hamwe Kiliziya z’ibihugu byombi by’u Rwanda n’u Burundi hamwe n’abaturanyi ba Tanzania na Kongo, bibera ikimenyetso cy’umubano w’akadasohoka n’ishingiro ry’ivanjili mu karere. Ni umwanya wo gushima Imana, kwibuka urugendo rw’amateka, gusubiza amaso inyuma no kongera kwiyemeza ubutumwa bw’ukwemera, ubumwe n’ubumuntu