“Ubumenyi butajyanye n’indangagaciro bushobora guteza ibibazo” – Myr Balthazar ku banyeshuri ba Fr Ramon Kabuga TSS

Ibi birori byabimburiwe n’Igitambo cya Misa cyaturiwe muri iri shuri rya Paruwasi Gatolika ya Kabuga muri Diyosezi ya Kabgayi. Ni umunsi ngarukamwaka wo kuzirikana no gusabira Padiri José Ramon Amunarriz witabye Imana ku wa 13 Gicurasi 2002, hibukwa uruhare rukomeye yagize mu iterambere rya Santarali Kabuga yaje kuba Paruwasi mu 2004 ndetse no mu ishingwa ry’iri shuri rimwitiriwe.

Yagize ati “Bana bacu mumenye gutega amatwi, mumenye kumva, iri shuri ni umubyeyi wanyu. Mutege amatwi inyigisho muhabwa kugira ngo mwubake ejo heza hanyu kandi ababashuka, abagome nibashaka kubayobya muzange.”

Mu butumwa bwe, Myr Balthazar Ntivuguruzwa yibukije abanyeshuri ko urubyiruko rwinshi muri iki gihe rushakira ibyishimo mu bintu by’isi bishira, abasaba guhitamo inzira nziza izabubakira ejo hazaza heza.

Yakomeje asobanura ko ubuzima ari uruhurirane rw’amahitamo umuntu afata buri munsi, abasaba guhora bahitamo icyiza aho gukurikira ibibi.

Ati “Buri munsi muhamagariwe guhitamo hagati yo gukora neza cyangwa kuba abanebwe, muhitemo gukora neza. Buri munsi mugomba guhitamo hagati yo kuvugisha ukuri no kubeshya, nimuhitemo kuvugisha ukuri. Buri munsi musabwe guhitamo gukora cyane cyangwa gushaka inzira zoroshye, mwebwe muhitemo gukora cyane.”

Yaburiye urubyiruko ku bishuko bishobora kwangiza ubuzima n’ejo habo hazaza birimo ubujura, ubusinzi, ibiyobyabwenge, uburiganya n’inyota y’amafaranga.

Ati “Hari igihe isi ibashukisha ibintu byangiza ejo hazaza hanyu birimo ubujura, uburiganya, ubusinzi, ibiyobyabwenge, kwiyandarika, inyota ikabije y’ifaranga, kwiheba n’ibindi. Bana bacu ibyo byose byangiza ejo hazaza hanyu nimubyime amatwi.”

Uyu mushumba wa Diyosezi ya Kabgayi yashimangiye ko intego y’ishuri atari ugutanga ubumenyi gusa, ahubwo ari ukurera abantu bafite ubushobozi n’indangagaciro.

Yagize ati“Mwaje muri iri shuri kugira ngo mwige imyuga, mwunguke ubumenyi n’ubushishozi bibafasha kubaka ubuzima bwanyu bw’uyu munsi ndetse n’ubuzima bwanyu bw’ejo hazaza. Nimukunde rero kwiga no kurerwa nk’uko insanganyamatsiko y’uburezi Gatolika ibivuga iti ‘Ndera neza, Nkure neza, Nkore neza.’ Muhitemo kuba abana bashoboye kandi bashobotse.”

Yanasabye abanyeshuri guhora bibuka ko Imana iha umugisha abakora neza kandi bakitangira abandi.Ati “Mumenye kandi muhore mwibuka ko Imana iha umugisha amaboko, ubwenge n’umutima biharanira gukora neza, kubaka, gusana, kuvura, guhanga no kwitangira abandi.”

Myr Balthazar yanibukije abanyeshuri amagambo ya Petero Intumwa abasaba gukomeza kwimakaza indangagaciro zibubaka.

Ati “Nimushyireho imbaraga zanyu zose kugira ngo ukwemera kwanyu mukongereho imigenzo myiza, imigenzo myiza muyongereho ubumenyi, ubumenyi mubwongereho ubwizige, ubwizige mubwongereho ubudacogora, ubudacogora mubwongereho ubusabaniramana, ubusabaniramana mubwongereho umubano wa kivandimwe n’urukundo.”

Yakomeje agaragaza ko isi ikeneye abantu bafite umutima mwiza n’indangagaciro, aho kuba abafite impamyabumenyi gusa.

Ati“Isi ntabwo ikeneye abantu gusa bafite ubumenyi cyangwa bafite impamyabumenyi cyangwa ubuhanga bwo mu ishuri, ahubwo ikeneye abantu b’inyangamugayo. Ni ba bandi bavuga ukuri, bakora neza kandi bafite umutima wo gukorera igihugu n’abantu.”

Yibukije kandi abanyeshuri kurangwa n’ikinyabupfura, umurava no kubahiriza inshingano zabo.Ati “Nimurangwe n’ikinyabupfura, murangwe n’umurava, mukunde kubahiriza igihe, nimukunde ubunyangamugayo, mukunde inshingano yanyu yo kwiga, mumenye kwigomwa ndetse mugire ubutwari igihe cyose kandi ubwo butwari bugaragarire cyane mu bikorwa.”

Mu buryo bwihariye, yasabye abanyeshuri bahawe amasakaramentu kugirana ubucuti bwa hafi na Yezu Kristu.

Yagize ati “Cyane cyane rero mwe muhawe amasakaramentu, Kristu azababere inshuti mudatana, inshuti mugendana, incuti musobanuza. Bana bacu Yezu ababere incuti kandi namwe mumubere incuti.”

Yakomeje abasaba gushyira Kristu imbere muri byose bakora.Ati “Mumuhe umwanya wa mbere mu masomo yanyu, mu mishinga yanyu, mu nzozi zanyu, mu buzima bwanyu bwose cyane cyane mu buzima bwanyu bwo mu bihe bizaza. Musenge mbere yo kwiga no gukora, mukunde ijambo ry’Imana kandi mujye murizirikana inshuro nyinshi, mwitabire Misa n’amasakaramentu kandi ntimukagire isoni zo kugaragaza ukwemera kwanyu.”

Mu gusoza ubutumwa bwe, Myr Balthazar yashimiye ababyeyi n’abarezi ku ruhare rwabo mu kurera urubyiruko, abasaba gukomeza kubera abana urugero rwiza.Ati“Urubyiruko ruradukeneye, abana bacu baradukeneye. Bakeneye ko tutabaha gusa ubumenyi ahubwo bakeneye ko tubaha n’urugero rwiza rw’ubuzima bw’indangagaciro za muntu n’ubwa gikristu. Bakeneye ko batureberaho kuko kwiga ni ukwigana