“Ubuyobozi si ubutegetsi, ni ugucungura abandi” – Padiri François Harelimana mu mahugurwa ya Sinodi i Cyangugu

Uyu munsi waranzwe n’ubutumwa bwimbitse bwatanzwe haganirwa ku ngingo eshatu arizo ubuyobozi kuri Kiliziya igenderahamwe, ubushishozi, urugendo rwo gufata ibyemezo muri kiliziya igenderahamwe ndetse n’ingingo igira iti’ kumurikira abandi ubutumwa muri kiliziya igenderahamwe,’

Padiri François Harelimana wo mu muryango w’Abapalotini, usanzwe akorera ubutumwa i Kibeho, yatumiwe nk’umwe mu bafashamyumvire kugira ngo asangize abitabiriye amahugurwa ubumenyi n’uburambe ku bijyanye na Sinodi n’uruhare rw’ubuyobozi muri Kiliziya igendera hamwe, mu nyigisho ye yibukije ko ubuyobozi muri Kiliziya atari ugukoresha ububasha bwo gutegeka, ahubwo ari ugushoboza abo umuntu ayoboye.

Yagize ati“Iyo tuvuga ubuyobozi akenshi twumva umutware n’ububasha afite. Nyamara muri Kiliziya igendera hamwe ubuyobozi bugenewe kubashisha abo ashinzwe, kubafasha kwinjira mu mugambi w’Imana. Roho Mutagatifu ni we uyobora Kiliziya, kandi ni we utuyobora mu kuri kose nk’uko Yezu Kristu yabidusezeranyije.”

Padiri François yibukije ko ubuyobozi bwa gikristu bushingiye kuri Yezu Kristu ubwe, ari we mutwe n’umutware w’umubiri wose wa Kiliziya. Ati: “Kristu adusangiza ububasha bwe kugira ngo tugire uruhare mu gukiza isi, kwirukana roho mbi no kwamamaza Inkuru Nziza. Ni We mwigisha wacu, natwe tukaba intumwa ze.”

Ubutumwa bwe bwibanze ku ndangagaciro nyazo zikwiye kuranga umuyobozi muri Kiliziya. Yavuze ati“Umuyobozi nyawe arangwa n’urukundo. Ubuyobozi butarimo urukundo rwigomwa, rwiha abandi kandi rwihangana, buhinduka ubuyobozi bwiyoboraho, bushaka inyungu zabwo. Ibyo bitera igitugu, uburyarya n’ubucakura, bikaba byakurura amacakubiri.”

Yashimangiye ko Inama Nkuru ya Kiliziya, Vatikani II, yahaye agaciro gakomeye ingeso yo guca bugufi no kuba abagaragu b’abandi. “Yezu Kristu ubwe ntiyaje gukorerwa, ahubwo yazanywe no gukorera abandi no gutanga ubugingo bwe. Ni we rugero nyakuri rw’ubuyobozi.”

Padiri François yanagarutse ku ngeso mbi izwi nka cléricalisme na Abus aho abayobozi bishyira hejuru bagakoresha ububasha bafite ku nyungu zabo bwite aho gukorera inyungu rusange aho bishobora kubya n'agasigane. Ati“Cléricalisme na Abus ni uburyo bugoreka imyumvire y’ubuyobozi, bukavamo imyitwarire igusha mu makosa akomeye, nko kwikubira umutungo, ihohoterwa rishingiye ku bitsina cyangwa kwiharira imyanzuro. Ubuyobozi nk’ubwo burasenya Kiliziya aho kuyubaka.”

Yongeyeho ko ubuyobozi bubi butera amacakubiri mu mubiri wa Kristu, mu gihe ubuyobozi bwiza butuma abayoborwa bisanzura, bagatanga umusanzu wabo mu gufata ibyemezo byubaka Kiliziya.

Padiri François yaboneyeho guhamagarira abagize Kiliziya guha agaciro abalayiki, yaba abagabo cyangwa abagore, kugira ngo bagire uruhare mu gufata ibyemezo.

Aha yifashishije Document final ya Sinodi, nimero ya 77, Padiri François yagize ati:

“Abalayiki baba abagabo cyangwa abagore nibahabwe umwanya wo gushishoza no gufata ibyemezo muri Kiliziya. Ibi si ugushaka kuzamurwa mu ntera, ahubwo ni ugusaranganya impano buri wese yahawe na Roho Mutagatifu ku nyungu z’abandi.”

Yashimangiye ko ibi bidakuraho urwego rwo kuba mukuru cyangwa se kuzamurwa mu ntera, ahubwo ari uburyo bwo gusaranganya impano buri wese afite ku nyungu rusange.Yagize ati“Ubuyobozi si ukuzamurwa mu ntera nk’uko akenshi tubyibwira, ahubwo ni uguhinduka umugaragu n’umuja w’abandi. Iyo buri wese yisanzuye mu muhamagaro we, iyogezabutumwa rirushaho kugira imbaraga, n’umurimo w’ikenurabushyo ukoroha.”

Padiri François yasoje ashimangira ko ubuyobozi muri Kiliziya igendera hamwe bugomba guharanira ubumwe, urukundo n’ubufatanye. Yavuze ko iyo indangagaciro nk’izo zishyizwe imbere, Kiliziya irushaho kuba umuryango uhuje, aho buri wese yisanga, agafatanya mu butumwa bwo kugeza Inkuru Nziza ku bantu bose.

Ku ruhande rw’abakristu n’abapadiri bitabiriye aya mahugurwa babwiye Kinyamateka ko mu nyigisho bahawe bakuyemo ko umuyobozi mwiza atagomba kumva ko azamuwe mu ntera ahubwo ko abereyeho gukorera abo ashinzwe kandi nk’abayobozi bakabonera umwanya ukwiye abo bayobora.

Padiri Theddee Nsenguremyi, ushinzwe komisiyo y’umuryango muri diyosezi ya Cyangugu mu kiganiro na Kinyamateka yagize ati” ubundi nk’uko tumaze kubyumva mu nyigisho ya padiri François, ubuyobozi bubereyeho gukuza, gufasha abo bushinzwe, nka Kiliziya rero umuryango w’imana ubuyozi bwayo buba bwiza iyo bufasha abayigize kwegera Kristu, gukurira mu kwemera no mu butagatifu. No mu rugo ni uko, buriya umugabo mu rugo kiliziya ifata ubuyobozi bw’urugo mbere na mbere nk’ubuyobozi bwahawe umugabo afatanyije n’umugore we, iyo umugabo abereyeho kumva agomba gukorera abo ashinzwe no kubakuza, urugo ruba rwiza naho iyo abitwaye ukundi akumva ko kuba ari umutware w’urugo, ari we utegeka, kumva ashaka ibyubahiro bye gusa urugo rurapfapfana. Hose rero ni kimwe, kuba umuyobozi haba mu bigo, muri Kiliziya aba agomba kumva ko agomba gukorera abo ashinzwe, abakuza, abafasha kujya mbere ibintu bigenda neza.”

Naho Simbarikure Jean d’Amour, umukristu wa paruwasi Katederali ya Cyangugu, waje muri iyi Sinode ahagarariye amashuri gatolika muri diyosezi yagize ati” hano twize ko umuyobozi agomba kuba umuyoborwa ndetse akaba n’umugaragu w’abo ahagarariye nk’uko Inama Nkuru ya Kiliziya, Vatikani II yabitangaje. Nk’uko twabibonye mu nyigisho twahawe aho umuyobozi agomba kuba umugaragu w’abo ayobora agamije kubitangira.”

Iyi nyigisho ya Padiri François Harelimana yagaragaje isura nyayo y’ubuyobozi Kiliziya ikeneye muri iki gihe cya Sinodi: ubuyobozi budaharanira ububasha cyangwa icyubahiro, ahubwo bushingiye ku rukundo, ku guca bugufi no ku gukorera abandi mu mucyo no mu bufatanye.