Umukandida ku buyobozi bwa ONU yifashishije isengesho rya Mutagatifu Fransisko w’Asizi asaba ONU kuba umusemburo w’ubumwe n’amahoro

Mu ijambo rye ryibanze ku hazaza h’Umuryango w’Abibumbye, Otunnu wigeze kuba Umunyamabanga Mukuru Wungirije wa ONU ndetse akaba yarabaye Intumwa Yihariye ishinzwe abana n’ibibazo by’intambara, yagarutse ku butumwa bwa Mutagatifu Fransisko w’i Asizi nk’isoko y’umwete mu guhangana n’amacakubiri ari kwiyongera ku isi.

Yifashishije isengesho rizwi cyane rya Mutagatifu Fransisko w’Asizi, Otunnu yagaragaje ko ONU ikwiye kuba urubuga ruhuza abantu n’ibihugu aho kuba urwego rugaragaza gusa amakimbirane n’amacakubiri ari hagati yabyo.

Ati “Ahari urwango, mpashyire urukundo; ahari amacakubiri, mpashyire ubumwe; ahari ukuyoba, mpashyire ukuri; ahari ugushidikanya, mpashyire ukwemera; ahari ukwiheba, mpashyire ukwizera; ahari icuraburindi, mpashyire urumuri; ahari agahinda, mpashyire ibyishimo.”

Aya magambo ya Mutagatifu Fransisko yagarutsweho na Otunnu mu gihe isi ihanganye n’intambara, amakimbirane, amacakubiri n’igabanuka ry’icyizere abantu bafitiye inzego mpuzamahanga.

Ku bwa Otunnu, ubutumwa buri muri iri sengesho bushobora kuba umurongo ngenderwaho mu kongera gutuma ONU igira uruhare rugaragara mu gukemura ibibazo by’isi no guhuza abantu batandukanye.

Ati “Ahari urwango, mpashyire urukundo”

Ubutumwa bwa Mutagatifu Fransisko bushyira urukundo mu mwanya w’urwango. Mu gihe ibihugu n’imiryango itandukanye bikomeje kugirana amakimbirane, uyu murongo usaba ko igisubizo cy’amacakubiri kitaba andi macakubiri, ahubwo kikaba ugushaka inzira yo kongera kubaka umubano n’ubwizerane.

Ni muri urwo rwego Otunnu yagaragaje ko ONU ikwiye kongera kuba umwanya w’ibiganiro no guhuza abarebwa n’amakimbirane, aho kuba umuryango uhora ugaragaza gusa ko ibihugu bitavuga rumwe.

Ati “Ahari amacakubiri, mpashyire ubumwe”

Mu isengesho rya Mutagatifu Fransisko, ubumwe ni igisubizo cy’amacakubiri. Ni ubutumwa bufite uburemere bwihariye mu isi irangwa n’amacakubiri muri politiki, ubukungu, amadini n’inyungu z’ibihugu.

Otunnu yavuze ko ONU ikeneye kongera gusubirana ijambo n’icyizere, kandi ko ibyo bidashoboka hatabayeho imbaraga zo guhuza abantu n’ibihugu.Ashimangira kandi ko ivugurura rya ONU atari ikintu gishobora gukomeza gusubikwa.

Ati “Ivugurura ntirikiri amahitamo. Ni ngombwa. Ritabayeho, uyu muryango ushobora guhura n’akaga gakomeye. Ntidushobora gukomeza gukora ibintu nk’uko byari bisanzwe.”

Guhitamo amagambo ya Mutagatifu Fransisko w’i Asizi kuri Otunnu bifite igisobanuro gikomeye. Mutagatifu Fransisko azwi cyane nk’umuntu warangwaga n’urukundo rw’ibiremwa byose, ubusabane, amahoro no kwicisha bugufi.

Isengesho rye ryibanda ku guhindura ibintu bibi bikaba byiza: urwango rugasimburwa n’urukundo, amacakubiri agasimburwa n’ubumwe, ukuri kukarwanya ukuyoba, ukwizera kugasimbura ugushidikanya, icyizere kigatsinda kwiheba, urumuri rugatsinda umwijima, naho ibyishimo bigasimbura agahinda.

Ni ubutumwa bwakomeza kugira agaciro no mu miyoborere y’isi, cyane cyane mu gihe umuryango mpuzamahanga uhanganye n’ibibazo bisaba ubufatanye burenze imipaka y’ibihugu.

Otunnu yabivugiye mu kiganiro cyahuje abakandida n’ibihugu bigize ONU ndetse n’imiryango itari iya za Leta, mu rwego rwo kureba no gusuzuma abahatanira gusimbura António Guterres ku mwanya w’Umunyamabanga Mukuru wa ONU.

Guterres azarangiza manda ye ku mpera z’uyu mwaka, nyuma yo kuyobora uwo muryango mu manda ebyiri z’imyaka itanu buri imwe. Otunnu w’imyaka 75 ni we mukuru mu myaka mu bakandida umunani bahatanye kugeza ubu.

Uzasimbura Guterres azahura n’akazi gakomeye ko kongera kubaka icyizere muri ONU, kuyinoza no kuyifasha kugira uruhare rufatika mu gukemura ibibazo byugarije isi.