Umunyamabanga wa Leta wa Vatikani yakiranywe ibyishimo i Burundi
Karidinali Pietro Parolin, Umunyamanga Mukuru wa Vatikani yageze mu gihugu cy'u Burundi kuri uyu wa 12 Kanama 2025, yakirwa n’imbaga nyamwinshi yari imutegereje irimo Abakristu n'Abayobozi mu nzego za Kiliziya na Leta.
Abayobozi batandukanye barimo Visi Perezida w’u Burundi, Prosper Bazombanza, Intumwa ya Papa mu Burundi Musenyeri Dieudonné Datonou, Abepiskopi bo mu Burundi bari barangajwe imbere na Perezida w’Inama y’Abepiskopi Gatolika mu Burundi, Musenyeri Bonaventure Nahimana, bari bakereye kwakira uyu mushyitsi muhire.
Mu Ijambo Karidinali yagejeje ku baje kumwakira yatangaje ko yishimiye kugera bwa mbere mu Burundi akaba anahageze mu gihe cy'ubuyobozi bushya bwa Papa Leo XIV, aboneraho kubagezaho intashyo za Nyirubutungane Papa.
Ati"Mbazaniye intashyo ya Papa Leo XIV. Arabatashya mwese. By'umwihariko aratashya abayobozi b'u Burundi mu nzego za Leta n'iza Kiliziya anabamenyesho ko azirikana u Burundi ndetse na Afurika yose."
Karidinali Parolin yakomeje avuga ko uruzinduko rwe i Burundi rwateguwe guhera muri 2023, akaba yishimiye ko rushobotse muri iki gihe kidasanzwe aho Kiliziya yitegura guhimbaza Asomusiyo ndetse rukaba rubaye mu gihe u Burundi na Vatikani bahimbaza isabukuru y'imyaka 60 y'umubano ushingiye kuri Ambasade.
Karidinali Parolin kandi yatangaje ko ubutumwa afitiye u Burundi bugaruka ku butumwa bwa Mutagatifu Papa Yohani Pawulo wa II, Papa rukumbi wasuye u Burundi kugera ubu. Mu butumwa yabahaye akigera i Burundi yaragize ati"Barundi namwe Barundikazi ejo hazaza h'igihugu cyanyu, hari mu biganza byanyu. Muhuze imbaraga z'amaboko n'iz'umutima kugira ngo mushobore kwita ku mibereho myiza y'abatuye igihugu cyanyu. Mutegurire urubyiruko rwanyu rwinshi igihugu rwishimiye kubamo. Mukore mutikoresheje muharanira iterambere ry'igihugu cyanyu. Kugira ngo igihugu cyanyu kirumbuke, kandi buri wese abashe gukoresha neza impano yahawe hatagize uwumva ko ahejwe. Ni byo mufite akazi katoroshye, ariko mwagashobora mufatanyije kandi mugatahiriza umugozi umwe."
Karidinali Parolin kandi yagaragaje ko yishimiye ko u Burundi bugiye gufungura Ambasade i Vatikani bikazatuma ibihugu byombi bishobora kurushaho gukorana no gufatanya gukemura ibibazo byaba ibireba impande zombi ndetse n'ibibazo rusange bireba isi yose.
Uruzinduko rwa Karidinali Parolin i Burundi ruzamara iminsi itandatu bikaba binateganyijwe ko azanahura n'umukuru w'Igihugu cy'u Burundi, Evariste NDAYISHIMIYE.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
