Umuryango w'Abamonaki ba Mutagatifu Benedigito wungutse umupadiri n'abadiyakoni babiri

Frere Jean Baptiste Mpayimana wahawe ubupadri yavutse tariki 06 Ugushyingo 1981 muri Paruwasi ya Cyeza Diyosezi ya Kabgayi mu karere ka Muhanga, yinjiye mu muryango w'Abamonaki ba Mutagatifu Benedigito, tariki 15 Ukuboza 2009, akora amasezerano ya mbere tariki 29 Kamena 2012, naho aya burundu ayakora tariki 9 Nzeri 2017. Yize Filozofiya na tewolojiya muri seminaire ya Namur [Belgique]. Furere Luka Umuhire wahawe ubudiyakoni we yavutse tariki 28 Werurwe 1981 muri Paruwasi Butamwa Arikidiyosezi ya Kigali mu karere ka Nyarugenge. Yinjiye muri Monastere tariki 27 Ugushyingo 2010, akora amasezerano ya mbere ku wa 29 Kamena 2013 naho amasezerano ya Burundu ayakora tariki ya 29 Kanama 2018 yize mu ishuri rikuru rya Bibiliya ryabaprotestanti imyaka itatu mbere yo kwinjira muri Monastere, yize kandi Filozofiya I Kabgayi, akaba arangije umwaka wa gatatu muri Tewolojia muri seminaire ya Namur mu Bubiligi.

Furere NZABAGERAGEZA Thadee nawe wahawe ubudiyakoni yavutse tariki 14 Mata 1976, muri Paruwasi Rwaza Diyosezi ya Ruhengeri, mu karere ka Musanze, yinjiye muri Monastere tariki 10 Ukwakira 2002, ahabwa amasezerano ya mbere tariki 19 Nzeri 2004, amasezerano ya burundu ayakora tariki 2 Kanama 2008. Yize Filozofiya I Buhimba muri Kongo, ubu akaba arangije umwaka wa gatatu muri teolojia muri seminaire nkuru ya Nyakibanda.

Myr Filipo Rukamba, Umwepiskopi wa Bitare, yasabye abahawe ubudiyakoni ndetse n'uwahawe ubupadri ko bagomba kuba abahamya n'abagabuzi b'Imana mu bantu barangwa n'ubwitange.Yasabye kandi abashyizwe mu rwego rw'abadiyakoni gukorera abantu no gukora icyo Imana ishaka babishyizeho umutima bafatanyije n'Abepisikopi.

Yasabye uwashyizwe mu rwego rw'abapadri, kwitanga atizigama no guhagurukira kuzirikana amategeko ya Nyagasani, kwemera ibyo yigisha, kuko ari byo byubake abakristu n'ingoma y'Imana.

Mu ijambo rye Furere Jean Baptiste Mpayimana yashimiye Imana yamushoboje, anashimira Umushumba wa Diyosezi Gatorika ya Butare wamuramburiye ho ibiganza, yashimiye kandi ababyeyi be bamutoje uburere bwa gikristu kuko babitojwe bakiri bato, ashimira abayobozi ba Paruwasi avukamo uko bamubaye hafi kuva akiri muto. Yashimiye kandi umuryango w'Abamonaki wabareze. Yasoje asaba abakristu kumusabira kugira ngo ibyo yasezeraniye Nyagasani azabashe kubimukomeza.

Umubyeyi wavuze Uhagarariye abandi mu muryango Frere J Baptiste Mpayimana avukamo, yavuze ko bishimiye kuba Frere J.Baptitse MPAYIMANA yahawe ubupadri cyane ko yabikunze kuva cyera, kuko bo babona Ingabire yahawe uyu munsi ayikomora mu buto bwe kuko yakundaga kwita ku batishoboye, agakunda umubyeyi Bikiramariya. Yasoje ashimira abakristu, inshuti n'abavandimwe baje gushyigikira intore Nyagasani yitoreye.

Myr Filipo RUKAMBA yahaye ubutumwa Padri wavutse kuzitanga ahantu hose azajya atumwa no kumvira iteka nk'uko yabisezeranye.