Umuyobozi w'Akarere ka Rubavu yasabye abapadiri bashya ba Diyosezi ya Nyundo kuba abafatanyabikorwa mu guhindura imibereho y'abaturage.

Uwo muhango wayobowe na Nyiricyubahiro Musenyeri Anaclet Mwumvaneza, Umwepiskopi wa Diyosezi ya Nyundo, afatanyije na Musenyeri Jean Marie Vianney Twagirayezu, Umwepiskopi wa Diyosezi ya Kibungo, uvuka muri Paruwasi ya Crête Congo-Nil yo muri Diyosezi ya Nyundo.

Muri uwo muhango, Diyosezi ya Nyundo yungutse abapadiri batandatu bashya ari bo Padiri Ndahimana Albert wa Paruwasi ya Crête Congo-Nil, Padiri Niyonsenga Théoneste wa Paruwasi ya Gakeri, Padiri Nsangiranabose Théophile wa Paruwasi ya Muhororo, Padiri Ntawukuriryayo Adrien wa Paruwasi ya Murunda, Padiri Tuyambaze Herman wa Paruwasi ya Kibingo na Padiri Uwimana André wa Paruwasi ya Crête Congo-Nil.

Mu ijambo rye, Umuyobozi w'akarere ka Rubavu, Bwana Mulindwa Prosper yashimiye abahawe Ubupadiri,Ubudiyani n'abahawe Ubusomyi n'Ubuhereza, avuga ko bageze ku ntego bari bamaze imyaka myinshi bategurirwa.

Yagize ati "Turabashimira kuko mwese mwageze ku nzozi zanyu. Turashimira ko mwakomeje kuba indahemuka ku muhamagaro wanyu. Ibi si ibya buri wese, kuko hari abo mwatangiranye urugendo batashoboye kugera aho mwe mugeze."

Yashimiye kandi Diyosezi Gatolika ya Nyundo n'abarezi b'aba bapadiri ku ruhare bagize mu kubategura, anizeza ko ubuyobozi bw'Akarere ka Rubavu buzafatanya na bo mu murimo bagiyemo

Umuyobozi w'Akarere ka Rubavu yavuze ko umuhamagaro w'abapadiri utareba Kiliziya yonyine, ahubwo ugirira akamaro Abanyarwanda bose kuko ugamije gukorera umuntu no guteza imbere imibereho ye.

Yagize ati "Ntabwo mwahisemo kwikorera, mwahisemo gukorera abandi. Gukorera Imana no gukorera igihugu ni ikintu kimwe. Gukorera Imana bitangirira ku gukorera abantu, kuko abo mukorera ni bo bagize igihugu."

Yakomeje agaragaza ko ibibazo bibangamiye abaturage birimo ubukene, uburwayi, abana batabona uko biga n'ibindi bibazo by'imibereho ari byo bisaba ubufatanye bw'inzego zose, harimo na Kiliziya.

Yasabye abapadiri bashya kuzaba abafatanyabikorwa mu guhindura imibereho n'imyumvire y'abaturage, babafasha kwigira no kwiteza imbere aho kubaho bateze amaboko.

Mu gusoza, Bwana Mulindwa yavuze ko Kiliziya Gatolika ari umufatanyabikorwa ukomeye wa Leta mu nzego zirimo uburezi, ubuvuzi, ubuhinzi n'iterambere ry'abaturage, asaba abapadiri bashya kuzinjira muri uwo murongo w'ubufatanye.

Ati"Murakaza neza mu kazi. Tuzakorana neza aho Muzoherezwa. Igihugu kibategerejeho uruhare rukomeye mu gufasha abaturage guhindura imyumvire, kwigira no kwiteza imbere."

Mu izina ry'abapadiri bashya, Padiri Ndahimana Albert yashimiye Nyiricyubahiro Musenyeri Anaclet Mwumvaneza wabahaye Isakaramentu ry'Ubusaserdoti, anashimira abapadiri bababereye abarezi, imiryango yabo n'abakomeje kubaherekeza mu rugendo rw'umuhamagaro.

Yashimangiye ko biteguye gukorana umurava aho Kiliziya izabohereza hose, bakabera abaturage abashumba beza barangwa no kubabwira Inkuru Nziza no kubaherekeza mu rugendo rw'iterambere ryabo rya roho n'iry'umubiri.