Umwami Charles n’Umwamikazi Camilla b’ Ubwongereza basuye Papa Leo wa XIV i Vatikani

Aba bageze i Vatikani mu gitondo, bakirwa mu cyubahiro . Imodoka  yari ibatwaye yanyuze muri Square ya Mutagatifu Petero, ahasanzwe hateranira imbaga y’abakirisitu baturutse imihanda yose, ibageza muri San Damaso Courtyard – umuryango w’icyubahiro winjirirwamo n’abashyitsi bakuru basura Papa mu Nyubako ye ya Gishumba (Apostolic Palace).

Mu muhango w’isengesho mpuzamatorero wabereye muri Square ya Mutagatifu Petero, Papa Leo wa XIV yashimangiye ko uru ruzinduko ari intambwe ikomeye mu gushimangira amahoro, ubwumvikane n’ubufatanye hagati y’amatorero n’amadini  y’Abakirisitu ku isi.

Yagize ati “Ukwemera kudashobora gusimbuzwa urukundo n’ubufatanye mu guhangana n’ibibazo byugarije abantu bose.”

Mu rwego rwo gushyigikira ubumwe mu madini, Umwami Charles III yabaye Umwami wa mbere w’u Bwongereza usengeye hamwe na Papa mu ruhame muri Chapelle Sistine, kuva igihe cy’ivugurura ryabaye mu kinyejana cya 16. Byaherukaga kuba mu mwaka wa 855, kandi ni bwo bwa mbere aba bayobozi bahuriye mu isengesho rihuriweho kuva Itorero Angilikani ryashingwa mu 1534, ubwo Papa Clement VII n’Umwami Henri VIII batumvikanaga ku micungire y’itorero.

Nyuma y’uyu muhango, Umwami n’Umwamikazi bakomeje ibiganiro n’Umushumba wa Kiliziya Gatolika  ku isi mu nyubako ya Apostolic Palace, bigaruka ku ruhare rw’amadini n’amatorero mu kubaka amahoro, ubumwe n’ubufatanye hagati y’Abakirisitu ku isi yose.

Uyu munsi udasanzwe wasize ushimangiye ko amahoro, ubwumvikane n’urukundo hagati y’amadini atandukanye bishoboka, kandi ko abakuru b’ibihugu bafite inshingano zo kubishyigikira no kubishyira mu bikorwa mu bumwe n’ubwumvikane..