Urukiko rwa Kiliziya mu Rwanda rwarangije amadosiye 23 ajyanye n’isakaramentu ry’Ugushyingirwa mu mwaka w’iyogezabutumwa wa 2025-2026

Ibi byatangajwe kuri uyu wa 13 Ukwakira 2026, ku Ruyenzi, ku Kicaro cy’Inama y’Abepiskopi Gatolika mu Rwanda, hateraniye inama yahuje abagize Urukiko rwa Kiliziya Gatolika mu Rwanda, igamije gusuzuma ibikorwa byakozwe mu mwaka w’iyogezabutumwa wa 2025-2026 no gutegura ibikorwa bizibandwaho mu mwaka mushya wa 2026-2027. Iyo nama yayobowe na Nyiricyubahiro Myr Jean Bosco Ntagungira, Umwepiskopi wa Butare akaba na Perezida w’Urukiko rwa Kiliziya Gatolika mu Rwanda.

Mu kiganiro Padiri Sylvère Komezusenge, Ofisiyari w’Urukiko rwa Kiliziya Gatolika mu Rwanda, yagiranye na Kinyamateka nyuma y’iyo nama, yavuze ko mu mwaka ushize w’iyogezabutumwa urukiko rwarangije amadosiye 23 yose, kandi ko yose yari yerekeye ibibazo bifitanye isano n’isakaramentu ry’Ugushyingirwa.

Yagize ati“Umwaka ushize w’ubutumwa twaciye imanza z’amadosiye 23, zose abantu babonye ibyangombwa nk’uko babyifuzaga kandi banyuzwe n’imyanzuro.”

Uretse guca izo manza, urukiko rwakoze n’ibindi bikorwa bigamije gufasha Kiliziya n’abakristu. Muri byo harimo gutegura agatabo kitwa Tugenderehamwe no kugira uruhare mu bikorwa byo guteza imbere uburenganzira bw’umwana, by’umwihariko binyuze mu gukoresha agatabo Protection des mineurs contre les abus sexuels, kateguwe n’Inama y’Abepiskopi Gatolika mu Rwanda. Ibyo bikorwa byakorewe hirya no hino mu madiyosezi.

Muri uyu mwaka mushya w’iyogezabutumwa wa 2026-2027, Myr Jean Bosco Ntagungira yasabye abagize urukiko gukomeza gukora umurimo wabo bafite umurava, ubwitange no kubahiriza igihe, kugira ngo ubutabera bwa Kiliziya bukomeze gutangwa neza.

Padiri Komezusenge yavuze ko Perezida w’urukiko yabasabye gukomeza kuba imboni ya Kiliziya mu by’ubutabera, ariko kandi bakita ku bana b’Imana bose baba bakeneye ubutabera, bakabafasha mu buryo bushoboka.

Yagize ati“Nyiricyubahiro Myr Jean Bosco Ntagungira, Perezida w’Urukiko rwa Kiliziya Gatolika mu Rwanda, yadusabye gukomeza gukorana umurava, tukaba imboni mu by’ubutabera bwa Kiliziya, turebera Kiliziya, tukaba imboni turebera abana b’Imana baba bakeneye ubutabera, kubafasha mu buryo bushobotse, dufite umurava kandi twubahiriza n’igihe gikwiye.”

Ibi bigaragaza ko mu mwaka mushya w’iyogezabutumwa, urukiko rugamije gukomeza kuzuza inshingano zarwo mu butabera bwa Kiliziya, rufasha abarusanga kubona ibisubizo ku bibazo byabo hakurikijwe amategeko n’amabwiriza ya Kiliziya Gatolika.

Ibibazo bijyanye n’isakaramentu ry’Ugushyingirwa ni byo byiganjemo amadosiye y’urukiko

Padiri Sylvère Komezusenge yasobanuye ko mu busanzwe Urukiko rwa Kiliziya Gatolika mu Rwanda rwakira ibibazo bitandukanye, ariko ko ibijyanye n’isakaramentu ry’Ugushyingirwa ari byo bikunze kurugana. Yagaragaje ko mu madosiye 23 rwarangije mu mwaka wa 2025-2026, yose yari yerekeye ibibazo bijyanye n’iryo sakaramentu.

Yavuze ko muri ibyo bibazo harimo iby’abashakanye bashyingiranywe mu buryo budahuje n’ibisabwa na Kiliziya, aho hashobora kuba harabayeho kubeshyana cyangwa umwe mu bashakanye akagira izindi nyungu agamije zitajyanye n’urukundo n’umuhamagaro w’isakaramentu ry’Ugushyingirwa.

Ati “Muri uyu mwaka ushize, urukiko rwa Kiliziya rwakemuye ibibazo bijyanye n’isakaramentu ry’Ugushyingirwa, ari na byo bibazo rukunda gukemura ubusanzwe. Cyane cyane twakiriye abantu bashyingiwe mu buryo butujuje ubuziranenge, umwe abeshya undi, undi afite izindi nyungu agamije zitari iz’urukundo rw’isakaramentu ry’abashakanye. Ibyo bibazo bikunda kuza, kuko n’amadosiye 23 twarangije umwaka ushize yose yari ay’abafite ibibazo bijyanye n’isakaramentu ry’Ugushyingirwa.”

Uretse ibyo bibazo, urukiko runakira n’ibijyanye n’imyitwarire muri rusange, cyane cyane iyo umukristu atubahirije inshingano ze ku buryo bikenera ubufasha bw’urukiko. Ibyo bishobora kuba bireba abapadiri cyangwa abihayimana, mu gihe hakenewe dosiye isuzuma ikibazo cyabo cyangwa raporo igomba koherezwa i Roma.

Padiri Komezusenge yasoje agaragaza ko urukiko rukomeza kwakira no gufasha abarukenera muri ibyo bibazo bitandukanye, bityo ko inshingano zarwo zitagarukira gusa ku manza zijyanye n’isakaramentu ry’Ugushyingirwa, ahubwo zinareba ibindi bibazo bisaba ubufasha bw’ubutabera bwa Kiliziya.