Abepiskopi bo muri Afurika y'Uburengerazuba bamaganye igitekerezo cyo gushoza Intambara muri Nijeri

Mu itangazo ryashyizwe ahagaragara n'aba Bepiskopi tariki 4 Kanama 2023, basabye abakuru b'ibihugu byo muri aka karere gushishoza no kwitondera icyemezo cyo gutera Nijeri gikomeje kuza imbere nk'igisubizo cy'ikibazo cy'ihirikwa ku butegetsi cyabaye muri iki gihugu.

Muri iyi baruwa yashyikirijwe abayobozi bagize umuryango uhuza ibihugu by'Afurika y'Uburengerazuba, Abepiskopi bibukije ko intambara atari umuti w'ibibazo ahubwo ibyongera.

Bagira bati"Twebwe Abepiskopi bo muri Afurika y'Uburengerazuba, duhangayikishijwe cyane n'ikibazo cya Politiki kiri mu gihugu cya Nijeri. Nk'abashumba turasaba abarebwa n'iki kibazo kurangwa n'ubushishozi harebwa mbere na mbere ibifitiye akamaro abaturage."

Abepiskopi bahereye ku mitere y'ikibazo bavuga ko intambara idakwiye gufatwa nk'igisubizo kuko ahubwo yarushaho kuzahaza igihugu n'abaturage batari borohewe n'ibitero by'imitwe y'iterabwoba.

Bati "Turahamya dukomeje ko igisubizo cy'intambara kitazakemura ikibazo cya Nijeri ahubwo ko kizarushaho kugikomeza no kongera ibibazo haba muri Nijeri no mu bihugu by'Afurika y'Uburengerazuba".

Muri iri tangazo Abepiskopi barasaba abayobozi b'ibihugu muri Afurika y'Uburasirazuba n'Umuryango w'Afurika Yunze Ubumwe gushyira imbere inyungu z'abaturage aho kwita ku nyungu bwite za bamwe baba abantu ku giti cyabo, ibihugu, imiryango cyangwa amadini.

Iri tangazo rishyizwe ahagaragara mu gihe umuryango w'Afurika y'Uburasirazuba ukomeje kwinangira mu gitekerezo cyawo cyo guhirika itsinda ry'abasirikare bahiritse umukuru w'igihugu cya Nijeri, ibintu Abepiskopi bavuga ko byaba ari ikosa rikomeye amateka yazababaza.