AFC/M23 yakiriye intumwa z'Inama y'Abepiskopi muri Repubulika Iharanira Demokarasi ya Kongo
Intumwa z'Inama y'Abepiskopi muri Repubulika Iharanira Demokarasi ya Kongo zakiriwe i Goma mu rwego rwo kuganira n'Abayobozi b'Umutwe wa AFC/M23.
Myr NSHOLE, Umunyamabanga w'Inama y'Abepiskopi muri Kongo yashimiye abayobozi b'uyu mutwe barangajwe imbere na Corneille Naanga, uko babakiriye avuga ko byabafashije kurushaho kumva akamaro ka gahunda yatangiwe na Kiliziya muri iki gihugu y'Igihango kigamije kubaka amahoro arambye muri Kongo n'umubano mwiza mu bihugu byo mu Karere.
Myr NSHOLE avuga ko muri uyu mwaka wa Yubile Kiliziya ishyize imbere amahoro ari na yo mpamvu yiyemeje kugirana ibiganiro n'abafite uruhare bose mu buzima bwa Kongo. Muri bo bakaba barabonye ko n'umutwe wa AFC/M23 hari icyo wafasha.
Yakomeje avuga ko mu biganiro bagiranye AFC/M23 yagaragaje ibibazo ifite ari na byo byatumye yiyemeza gufata intwaro inasobanura ibibazo iregwa birimo gushaka gushyiraho Leta yigenga no gucukura amabuye y'agaciro binyuranyije n'amategeko mu rwego rwo kuyasahura.
Kiliziya Gatolika muri Repubulika Iharanira Demokarasi ya Kongo yemeza ko ikibazo cya Kongo kidashobora kurangizwa n'Intambara ari na yo mpamvu yashyizeho iyi gahunda ifatanyije n'amadini ya Gikristu ngo Abanyekongo bose baganire barebere hamwe igisubizo kirambye cy'umutekano muke wabaye akarande muri iki gihugu.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
