Byumba: Ibanga ry’ibyishimo by’abakristu ba Paruwasi Nyarurema ikomeje kubyarira Kiliziya Abasaseridoti n’Abepiskopi
Ku wa 8 Nyakanga 2023, Musenyeri Papias Musengamana Umwepiskopi wa Byumba yahaye Diyakoni Michel Muhoza wo muri Paruwasi ya Nyarurema Isakaramentu ry’Ubusaseridoti, aba umupadiri wa 15 uvuka muri iyi paruwasi, ari nayo Myr Seriviliyani Nzakamwita Umwepiskopi wa Byumba uri mu kiruhuko cy’izabukuru avukamo.
Muri uyu muhango, Myr Papias Musengamana yatanze Ubudiyakoni ku bafaratiri bane aribo:Fratri Eugène Niyigena na Fratri Gildas Uriwenuwe bakomoka muri paruwasi ya Muyanza, Fratri Viateur Hakorimana ukomoka muri paruwasi ya Bungwe na Fratri Wellars Ruyange Mpabuka ukomoka muri paruwasi ya Burehe.Abakristu b’iyi Paruwasi bakemeza ko ari ibyiza by’Imana byiyongeza muri byinshi yabahaye, abana babo bakaba bakomeje kuyiyegurira.
Mu nyigisho, Umwepiskopi yasobanuriye abakristu ibyo umurimo wa gisaseridoti, avuga ko aba batowe bagiye guhabwa ubudiyakoni n’ubupadiri kugira ngo bafatanye n’umwepisikopi mu kwigisha no gutagatifuza imbaga. Yasabye abahawe ubudiyakoni n’ubusaseridoti guhamya ibirindiro mu buzima bushya batanga amasakramentu, bakanahimbaza imihango mitagatifu. Yabibukije ko bagomba gukora umurimo wabo bunze ubumwe n’umwepiskopi kandi bamwumvira,abasaba guhora barangamiye Kristu we utarazanywe no kugaragirwa ahubwo kugaragira.
Abakristu ba Paruwasi Nyarurema bishimiye kandi kwifatanya na Padiri Gahutu Paul uvuka muri paruwasi ya Rwamiko wizihije Yubile y’imyaka 25 amaze ahawe Ubusaseridoti.Bagaragaza ko bishimiye itangwa ry’ubusaseridoti ku mudiyakoni uvuka muri iyi paruwasi.
Nyuma y’Igitambo cya Misa, abafashe ijambo bagarutse ku gushimira; bashimira Imana ikomeje gutora muri iyi paruwasi intumwa maze ikazituma mu murima wayo ariwo Kiliziya.
Musenyeri Papias Musengamana, umushumba wa Diyosezi ya Byumba yashimiye abahawe ubudiyakoni n’ubupadiri, ashimira Paul Gahutu ku myaka 25 amaze ari umupadiri. Asaba umupadiri mushya gukomezwa n’umuhamya bwa Padiri Paul Gahutu, abwira kandi Padiri Gahutu kwishimira ko inzira yahisemo hari abakiyimukurikiyemo.
Padiri Paul Gahutu yasangije abari aho ubuzima bwe bwa gisaseridoti, bwayobowe no kumvira mu myaka 25 amaze ahawe Ubusaseridoti, naho Padiri Muhoza Michel padiri mushya, ashimirwa ko atumye paruwasi Nyarurema yongera gusubiza ingobyi imugongo, kuko aje akurikira abapadiri babiri babuhawe umwaka ushize .
Paruwasi Nyarurema imaze kubyarira Kiliziya abapadiri 15 barimo na Padiri Michel Muhoza wabuhawe kuri iyi tariki. Abo bapadiri ni Mgr Servilien Nzakamwita, Mgr Vincent Barugahare, P. Alfred Rutagengwa, P. Sibomana Theodomir, P. Kamana Didace, P. Jean Nepomuscene Harerimana, P. Sylvere Munyangabire, P. Antoine Ngamije Mihigo, P. Mundere Dominique, P. Ildephonse Gatete, P. Mukiza Gilbert, P. Munyarukundo Athanase, P. Alexis Ndayisaba Singizwa na P. Jean d’Amour Ntiritsimburwa Businge.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
