Cyangugu yahimbaje Misa y'Amavuta Matagatifu

Ni Misa ubusanzwe iba kuwa Kane mutagatifu mu gitondo ariko ishobora kwimurirwa ku wundi munsi kugira ngo Abapadiri babashe kuyitabira kandi bitababujije gusoma Misa y'isangira ritagatifu iba kuwa Kane mutagatifu nimugoroba.

Muri Diyosezi ya Cyangugu ikaba yabaye kuri uyu wa gatatu Mutagatifu ibera muri Katederali ya Cyangugu yitabirwa n'Abapadiri Abihayimana n'Abakristu benshi baje kwifatanya n'umwepiskopi n'abasaserdoti babo kuri uyu munsi udasanzwe.

Muri iki Gitambo cy’Ukaristiya Myr Edouard Sinayobye yahaye umugisha amavuta matagatifu. Amavuta matagatifu yahawe umugisha agenewe gutagatifuza Umuryango w’Imana, harimo amavuta ya Krisma akoreshwa mu Masakaramentu ya Batisimu, Ugukomezwa n’Ubusaseridoti; Amavuta y’abigishwa afasha abari mu rugendo rwa Batisimu n’Amavuta y’abarwayi aramira abarwayi mu ntege nke zabo.

Uretse guha umugisha amavuta, Abapadiri ba Diyosezi ya Cyangugu banasubiye mu masezerano bongera kwiyemeza gukomeza kurangiza neza ubutumwa batorewe na Nyagasani.

Nk'uko amagambo ateganywa muri uyu muhango abisobanura, gusubira mu masezerano y’ubusaseridoti ku Bapadiri ni umwanya wo kurushaho kunga ubumwe na Kristu no kumukurikira, bitanga ubudatezuka ku mirimo mitagatifu bakorera Kiliziya, babitewe n’urukundo rwa Kristu. Bakiyemeza kurushaho kuba abagabuzi n’indahemuka b’amabanga y’Imana mu guhimbaza Ukaristiya Ntagatifu n’iyindi mihango mitagatifu ya Kiliziya, mu gutunganya ku buryo buzira amakemwa umurimo mwiza wo kwigisha, gutagatifuza no kuyobora abantu mu nzira y’umukiro mu kubereka inzira y’Imana.