Diyosezi ya Butare yamuritse imfashanyigisho izajya yifashishwa mu rugendo rw'Isanamitima

Ni igikorwa cyabereye muri Sale yiyi komisiyo izwi nka sale ya Ecoute Active, kitabirwa n'abarimo Myr Filipo Rukamba Umwepiskopi wa Diyosezi ya Butare, Mukayiranga Laurence Umukozi muri Minisiteri y'Ubumwe bw'Abanyarwanda n'Inshingano Mboneragihugu [MINUBUMWE], mu ishami ryo guteza imbere Ubumwe nUbudaheranwa, Omer Mayobera wari uhagarariye Alert International, Francis Zebaze wari uhagarariye CEJP, Umuyobozi w'Akarere ka Nyaruguru Dr Emmanuel Murwanashyaka, Abayobozi bakorana bya hafi na Komisiyo y'Ubutabera n'Amahoro ya Diyosezi ya Butare, Abapadiri, n'abandi bakora iyogezabutumwa muri Diyosezi no mu maparuwasi.

Umuyobozi wa Komisiyo y'Ubutabera n'Amahoro yo muri Diyosezi ya Butare Padiri Rutayisire Josbert, Mu kiganiro yagiranye na Kinyamateka yayitangarije ko igitekerezo cyo gukora iyi mfashanyigisho cyaturutse ku kuba abakora ibikorwa by'isanamitima nta mfashanyigisho bagiraga aho buri wese yigishaga uko abyumva, bamwe bakabura aho bahera bafasha abantu, bibatera gushaka uko bakora imfashanyigisho yajya ibahuza, ikaba ari imfashanyigisho yatwaye hafi umwaka kugira ngo iboneke.

Yatangaje kandi ko iyi mfashanyigisho igenewe mbere na mbere abapadiri nk'abafite ubutumwa bwo gufasha abantu kwiyunga n'Imana, kwiyunga na bo ubwabo no kwiyunga n'abandi. Avuga kandi ko izafasha na Leta n'indi miryango ifasha mu byerekeranye n'isanamitima.

Agaruka ku ngingo zigize iyi mfashanyigisho yavuze ko ikubiyemo izigera kuri 4 ari zo; Gutangira urugendo rw'Isanamitima, Ubumwe n'Ubudaheranwa, kudaheranwa n'ingaruka z'amacakubiri yaranze u Rwanda umurikiwe n'Ijambo ry'Imana, Kubaho no kubana mu mahoro n'ibikorwa byubaka Ubumwe, Ubwiyunge n'Ubudaheranwa mu muryango Nyarwanda.

Padiri Josbert yasabye ko abahawe iyi mfashanyigisho bayikoresha neza igafasha abakirisitu mu maparuwsi atandukanye.

Padiri Bwema yagaragaje ko iyi mfashanyigisho iziye igihe kuko yari ikenewe kugira ngo bamurikiwe n'Ijambo ry'Imana n'ukwemera bazabashe gufasha umunyarwanda wemera kwakira ubuzima bw'umunyarwanda n'amateka ye agaharanira kureba imbere.

Padiri mukuru wa Paruwasi ya Gisagara Padiri Lambert Bwema wavuze mu izina rya bagenzi be, yashimiye abateguye iyi mfashanyigisho n'abateguye uyu munsi kugira ngo bayibamurikire. Yakomeje avuga ko iyi mfashanyigisho izafasha mu murimo wa Kiliziya wo kunga abantu n'Imana no guha abantu Icyizere, ibafasha kurenga amateka mabi yaranze u Rwanda, ibibi byabaye bikaba isomo ry'uko bakwiye kubaho mu buzima butagira amacakubiri n'ingengabitekerezo.

Umuyobozi wAkarere ka Nyaruguru Dr Emmanuel Murwanashyaka, yavuze ko ibiganiro 33 biri muri iyi mfashanyigisho, bagiye kubigeza ku baturage kuko hari ikibazo cy'abatinya gutanga ibiganiro by'isanamitima kubera kubura imfashanyigisho.

Myr Filipo Rukamba, Umwepiskopi wa Diyosezi ya Butare wanafunguye ku mugaragaro Imfashanyigisho ku rugendo rwisanamitima, ubumwe, ubwiyunge n'ubudaheranwa by'abanyarwanda akanayigeza ku bapadiri, abashinzwe ibikorwa bya Komisiyo yUbutabera nAmahoro, n'abandi bakora iyogezabutumwa muri Diyosezi no mu maparuwasi, yavuze ko abantu bose bakoraga ibijyanye n'isanamitima babikoraga uko babonye, nta nzira ihari ku buryo bugaragara. Akomeza avuga ko ubu ibonetse. Myr Rukamba yaboneyeho gutangaza ko muri Diyosezi bagiye gufata abantu bazajya bigisha bakanasobanura ibikubiye muri iyi mfashanyigisho bikazatuma amaparuwasi kugera ubu atakoraga ibikorwa by'isanamitima na yo ashobora kubikora.

Mukayiranga Laurence, Umukozi muri Minisiteri y'Ubumwe bw'Abanyarwanda n'Inshingano Mboneragihugu [MINUBUMWE], mu ishami ryo guteza imbere Ubumwe bw'abanyarwanda n'Ubudaheranwa, yavuze ko iyi ari intambwe nziza cyane Diyosezi ya Butare iteye yo gushyira hamwe inyigisho n'ibiganiro bizifashishwa muri gahunda z'isanamitima, ubumwe n'ubudaheranwa. Yakomeje avuga ko mu myaka 30 ishize Jenoside ihagaritswe abantu bagiye bagira inyigisho zitandukanye ariko ugasanga bakora mu buryo bwo kwirwanaho, ibyatumaga hari n'ababitinya kubera kutagira ubushobozi cyangwa ubumenyi bwihariye bigatuma badafasha abandi. Yongeyeho ko kuba iyi Komisiyo yaragize igitekerezo cyo gukora imfashanyigisho bakanatumira abapadiri bose mu maparuwasi kugira ngo bayishyikirizwe ari intambwe ikomeye, kuko babonye amasomo, n'uwari ufite intege nke afite aho azahera.

Mukayiranga Laurence kandi yasabye n'andi madini n'amatorero kugira gahunda nk'iyi yihariye ijyanye n'isanamitima no gufasha abanyarwanda gukira ibikomere, kubana neza n'ubudaheranwa.

Iyi mfashanyigisho yateguwe ku bufatanye n'abarimo bamwe mu bari muri kaminuza Gatolika y'u Rwanda [CUR], bamwe mu babarizwa muri RIME COMPANY LTD, MHDF, na bamwe mu bapadiri ba Paruwasi zitandukanye bagiye bategura bimwe mu biganiro biri muri iyi mfashanyigisho.