Diyosezi ya Butare yatangije ikigo cy'amahugurwa mu myuga kizafasha abana b'abakobwa babyariye iwabo kwiteza imbere

Nk'uko twabitangarijwe na Padiri Kwitonda Gilbert, umuyobozi wa Caritas ya Diyosezi ya Butare, icyo iki kigo kigamije, ni ugufasha urubyiruko kwiga imyuga izarufasha kwibeshaho no kwiteza imbere ndetse bakita no kumiryango yabo.

Mu myuga itangwa muri iki kigo harimo: ubudozi, Kuboha imisatsi hakazaniyongeramo Ubutetsi mu gihe cya vuba. Muri iki kigo kandi urubyiruko rwigishwa kwihangira imirimo rwibumbira mu makoperative, ndetse rugatozwa umuco n'imigenzo myiza. Rugira kandi umwanya wo kwidagadura mu rwego rwo kongera kwiyubaka amizero y'ejo hazaza.

Muri iki kigo kandi hakorerwa imirimo y'ubuhinzi n'ubworozi, mu rwego rwo gufasha urubyiruko kwiteza imbere binyuze mu gukora ubworozi bw'amatungo magufi. Iyi mirimo kandi itanga umusaruro urimo amagi yifashishwa mu kurwanya imirire mibi mu bana babyawe n'abakobwa badafite ubushobozi bwo kubitaho ndetse akenshi bagatereranwa n'imiryango yabo.

Mu gikorwa cyo gusoza icyumweru cy'uburezi Gatolika cyabereye i Butare tariki 3 Kamena 2022, Myr Filipo Rukamba, yahamagariye inzego zitandukanye guhagurukira ikibazo cy'abana baterwa inda bakiri bato kuko gishamikiraho ibindi bibazo bibangamira bikomeye imibereho myiza y'abaturage n'iy'abana by'umwihariko.

Kugera ubu "Centre des jeunes Saint Vincent" ibarirwamo abakobwa 120 barimo 80 biga umwuga w'Ubudozi . Icyiciro cya mbere cy'abiga uyu mwuba bakaba baratangiye no kuwukuramo inyungu kuko Caritas yabafashije gukora koperative ikora ibikapu mu bitenge. Iyi Koperative ikaba yarabonye n'isoko mu gihugu cy'u Butaliyani, uyu mwaka wonyine ikaba imaze koherezayo ibikapu ibihumbi 26 aho igikapu kimwe bakigurisha amafaranga 1500.