GS Bugumira yongeye kwandika amateka ku Kirwa cya Nkombo yegukana igikombe ku rwego rw'igihugu

Iyi kipe itwaye iki gikombe nyuma y'urugendo rurerure yanyuzemo dore ko nyuma yo guhigika amakipe yo mu karere ka Rusizi ibarizwamo, yasezereye amakipe atandukanye yari ahagarariye uturere turimo Nyamasheke, Nyamagabe, Huye, Rubavu na Gatsibo yasezereye ku mukino wa Nyuma.

Nk'uko twabitangarijwe n'umuyobozi wa GS Bugumira, iri shuri ni ubwa mbere ribashije kurenga urwego rw'umurenge, bikaba bisa n'ibitangaje ukuntu ku nshuro ya mbere ryabashije kurenga urwego rw'Akarere, urw'intara rikaba rigeze ku rwego rwo guhagararira igihugu. Uyu muyobozi avuga ko ibanga bakoresheje nta rindi uretse guha agaciro imikino no kuyikunda.

Kimwe mu bitangaje kuri iyi kipe, ni uko n'ubwo igeze kuri uru rwego, kugera ubu itagira ikibuga cyo gukiniraho, ntigire imipira ihagije yo gukina ndetse ikaba nta n'umutoza uzi iby'uyu mukino igira. Umuyobozi w'iri shuri yadutangarije ko ikibuga iyi kipe ikoreraho imyitozo ari ikibuga cy'akagari giherereye nko mu rugendo rw'iminota 20 n'amaguru uvuye aho ishuri riherereye. Ku bijyanye n'imipira yo gukina uyu muyobozi avuga ko bafite imipira ibiri gusa. Avuga kandi ko uretse imipira iyi kipe ikeneye n'ibindi bikoresho nk'imyenda yo gukinana, inkweto n'imyambaro yo gusohokana kugira ngo bazaserukire igihugu bakeye.

Umuyobozi wa GS Bugumira avuga ko n'ubwo hari byinshi babura, nk'ikigo bakomeje gukora ibishoboka byose mu rwego rwo kwita ku mpano z'abana, n'ubwo amikoro y'ishuri ari make. Ashimira Padiri NSHIMIYIMANA Fidele, Padiri mukuru wa paruwasi ya Nkombo, na paruwasi ya Nkombo muri rusange, uko yakomeje kuba hafi iyi kipe kugera itwaye igikombe ku rwego rw'igihugu.

Mu rwego kandi rwo kunganira amashuri mu kwita kuri Siporo, uyu muyobozi asaba ko hatekerezwa ku bihembo bihabwa amakipe yatsinze. Nk'uko yabidutangarije, mu bikombe 3 byose batwaye kuva ku rwego rw'Akarere, uretse akarere kabahaye igihembo cy'amafaranga ibihumbi makumyabiri (20,000), nta kindi gihembo gifatika bahawe. Avuga ko bibabaje kuba watwara igikombe ku rwego rw'igihugu ugatahira ishema ntikigire ishimwe rifatika rigiherekeza.

Ku birebana n'uko iyi kipe yiteguye kuzahagararira igihugu, umuyobozi wa GS Bugumira avuga ko biteguye gukora ibishoboka byose n'igikombe mpuzamahanga bakazagitwara. Avuga ko abana bishimiye cyane kuzahagararira igihugu, bakaba bashimishijwe cyane n'uko yaba ari amahirwe yabo ya mbere yo kugera mu mahanga no kugendera mu ndege, dore ko kugera ubu bari bazi iyo babona mu kirere no muri filimi gusa.

Uretse GS Bugumira yegukanye igikombe mu mupira w'amaguru, andi makipe yatwaye ibikombe ni

GS Gisanze y'i Nyamagabe yatwaye igikombe mu mupira w'amaguru w'abakobwa; muri Volleyball abahungu igikombe gitwarwa na CS Amizero yo mu Ruhango; Muri Handball y’Abahungu, EP Ntendezi y’i Nyamasheke yegukanye igikombe itsinze GS Mwendo yo mu Bugesera ibitego 17-7 naho mu bakobwa, igikombe cyatwawe na Hope Institute y’i Muhanga itsinze GS Karama y’i Musanze ibitego 15-9; Muri Basketball APACOPE yo mu Karere ka Nyarugenge yatsinze GS Karwasa y’i Musanze amanota 30-24 na ho mu bakobwa, igikombe gitwarwa na GS Gikonko Catholique y’i Gisagara itsinze GS Muzizi y’i Kayonza amanota 22- 16. Muri Netball, igikombe cyatwawe na EP Les Etoiles y’i Rubengera muri Karongi nyuma yo gutsinda EP Sanzu y’i Gisagara amanota 10-9.