Intumwa ya Papa mu Rwanda yibukije ko Caritas itandukanye n'indi miryango ifasha

Yagize ati"Mu gihe mugiye kugaragaza ibyakozwe muri 2023, n'ibiteganyijwe muri 2024, munyemerere mbibutse umwimerere wa Caritas udakwiye kumirwa n'izi gahunda zisanzwe z'imirimo."

Mu Ijambo rye, Myr Catalan, yibukije ubutumwa Papa Fransisiko yahaye abanyamaryango ba Caritas International, aho yibukije ko Caritas idashingira akamaro kayo ku bikorwa ikora ahubwo ko ishingira ku muhamagaro wayo wo guhamya urukundo.

Yakomeje agira ati"Ubwo papa yafunguraga Inteko rusange ya Caritas Internationalis yagize ati urukundo,Caritas ni ubuzima bwacu. Ni rwo rutugira abo turi bo. Iyo twakiriye urukundo rw'Imana kandi tugakundana nk'abavandimwe,ni bwo tuba tubaye abo turi bo koko n'abo dukwiye kubabo by'ukuri, buri muntu ku giti cye na Kiliziya muri rusange."

Nk'uko yakomeje abisobanura Caritas yabayeho kugira ngo ibe ikimenyetso gifatika cy'urukundo haba hagati mu bakristu ubwabo ndetse no hagati y'Amadiyosezi.

Aha ni ho yahereye agaragaza ko Caritas itabereyeho gukora imishinga igamije iterambere n'imibereho myiza y'abaturage gusa ahubwo ibereyeho kugaragaza urukundo rw'Imana.

Ati"Ikigaragaza ko Caritas yageze ku ntego zayo ntabwo ari ugukora imishinga iteza imbere imibereho myiza n'iy'ubutabazi, ahubwo ni ugufasha umwepiskopi na Kiliziya muri rusange kwimakaza umutima w'urukundo n'ubufatanye."

Myr Catalan yibukije Caritas guhora yibuka ko uru rukundo rw'Imana n'urw'Abavandimwe ari wo mwihariko wayo uyitandukanya n'indi mishinga n'imiryango ikora ibikorwa by'iterambere ry'imibereho myiza n'ubutabazi.

Ati"Ni ngombwa igihe cyose kwibuka umwihariko wa Caritas, n'ishingiro ry'ibikorwa byayo. Urukundo Imana idukunda n'umuhamagaro wacu wo kunga ubumwe mu rukundo.Urukundo ni wo mwihariko wanyu. Ni rwo rubatandukanya n'indi miryango itera inkunga."

Inteko rusange ya caritas izamara iminsi ibiri ikaba yitabiriwe n'Abepiskopi, abakozi ba Caritas n'abanyamabanga b'amakomisiyo atandukanye y'Inama y'abepiskopi Gatolika mu Rwanda.