"Kiliziya idafite umugore hari byinshi bitatungana", Padiri Valens

Padiri Valens NIRAGIRE, Umunyamabanga Mukuru wa Komisiyo y'Abepiskopi y'Ubutabera n'Amahoro mu Rwanda, yagaragaje agaciro n'umwanya ukomeye umugore afite muri Kiliziya.

Ibi birori by'umunsi w'Abagore byitabiriwe n'abakozi b'Inama y'Abepiskopi Gatolika mu Rwanda bari kumwe n'abanyeshuri bo mu Rwunge rw'Amashuri rwa Nduba TSS bibumbiye muri Club yo kurwanya ihohoterwa. Byaranzwe n'Igitambo cya Misa yo gusabira Abagore yayobowe na Padiri Kayisabe Vedaste, umunyamabanga Mukuru w'Inama y'Abepiskopi Gatolika mu Rwanda, ikurikirwa n'ubutumwa butandukanye bwatanzwe mu magambo no mu buvanganzo butandukanye.

Padiri Valens NIRAGIRE yifashishije Ibaruwa Pawulo Mutagatifu yandikiye Abanyefezi umutwe wa Gatanu, yasabye buri wese kubaha umugore kuko ari umubyeyi no kumurindwa icyamuhutaza cyose.

Ati"Umugore afite umwanya ukomeye muri Kiliziya. Arubashywe kandi arakunzwe. Kiliziya idafite abategarugori bayiba hafi mu butumwa bwayo, hari byinshi bitatungana. Dukunze kubona abasaseridoti mu butumwa bwabo bunganirwa n'abategarugori kugira ngo imirimo yabo igende neza. Inyigisho mbonezamubano za Kilizya nazo zitubwira ko umugore ari uwagaciro gakomeye. Tuzi ko na Bikira Mariya yatubyariye umukiza, akaba afite umwanya ukomeye muri Kiliziya."

Yakomeje avuga ko mu Rwanda uyu munsi uba ukomeye kuko aba ari umunsi wo kwishimira intambwe imaze guterwa ku ruhare rw'abagore mu iterambere ry'igihugu n'irya Kiliziya mu bijyanye n'ubukungu, Politike, imibereho myiza n'ibindi no kurebeta hamwe imbogamizi zikibangamiye iterambere ry'umugore bityo zigashakirwa igisubizo kirambye kugira ngo uburenganzira bw'umugore bwuzure.

Sr Epiphanie Umubyeyi ushinzwe kurwanya ihohoterwa rikorerwa abagore muri Komisiyo y'Abepiskopi y'Ubutabera n'Amahoro,mu butumwa bwe yagarutse ku mavu n'amavuko y'umunsi w'abagore n'icyo kuwuhimbaza bisobanuye.

Ati"Umunsi Mpuzamahanga w'Umugore washyizweho n'Umuryango w'Abibumbye mu 1972, ugamije kugaragaza ibyagezweho mu iterambere ry'Uburinganire bw'abagabo n'Abagore, uburenganzira no kubaka ubushobozi bwumugore."

Consolate Baranyizigiye mu izina ry'abagore b'abakozi ba Komisiyo y'Ubutabera n'Amahoro yavuze ko bashimira intambwe bariho asaba bagenzi be kutazapfusha ubusa amahirwe bafite.

Umunsi mpuzamahanga w'umugore uyu mwaka wa 2025 urizihijwe ku nshuro ya 53 ku rwego rw'isi mu gihe mu Rwanda ari ku nshuro ya 50 wizihizwa.