Abapadiri b’Abapalotini bahimbaje yubile y’imyaka 25 bashimiwe ubwitange n’umurava byabaranze

Padiri Chrysante Rwasa uvuka muri Paruwasi ya Masaka muri Arikidiyosezi ya Kigali, na Padiri Gérard Kamegeri uvuka muri Paruwasi ya Goma muri Repubulika Iharanira Demokarasi ya Kongo ubu akaba akorera Ubutumwa mu gihugu cya Kanada, bizihije imyaka 25 bahawe ubupadiri naho Padiri Jules- Eusèbe Mutabaruka uvuka muri Paruwasi Katederali ya Kibungo ubu akaba akorera ubutumwa mu Gihugu cy’u Bufaransa na Padiri Faustin Juvénal Ndagijimana wo muri Paruwasi ya Nyakinama akaba akorera ubutumwa mu gihugu cy'Ububiligi bizihiza imyaka 25 bakakoze amasezerano ya mbere.

Mu butumwa butandukanye bwatanzwe, aba bapadiri bashimiwe ubwitange n'umurava byabaranze mu myaka bamaze mu butumwa.

Nyicyubahiro Antoine Karidinali Kambanda Arikiyepiskopi wa Kigali wari umushyitsi mukuru, mu butumwa bwe yashimiye aba bapadiri bitanze mu myaka 25 bamaze ashimira n’uyu muryango w’Abapalotini ukomeje kwera imbuto nyinshi.

Yagize ati"Aba bavandimwe Padiri Jules- Eusèbe Mutabaruka, Padiri Faustin Juvénal Ndagijimana, Padiri Chrysante Rwasa na Padiri Gérard Kamegeri, bamaze imyaka 25 bahamya ko ntakirutimana. Turabashimira ku bw’amatarenta, Ingabire y’amahoro, kuba inyangamugayo, kwitanga no kutizigama ni ibintu tubashimira cyane mu muryango wanyu."

Yaakomereje kuri padiri Jules agira ati"

Padiri Jules-Eusèbe Mutabaruka ni imfura cyane. Aho mwasezeraniye ni ho muhurira ariko kandi icyo mutavuganye ntacyo nyine, icyo kintu ndakimukundira. Iyo avuze ngo yego ni yego n'iyo ari oya ni oya. Mujye mumenya guhakana mukomeje no kwemera mukomeje nka Padiri Jules, niba mushaka urugero rwiza muzajye kwa Padiri Jules- Eusèbe Mutabaruka."

Ati"Aba bapadiri bombi ndabavugaho umwe ku wundi. ndahera kuri Padiri Faustin Juvénal Ndagijimana. Ni umugabo w’umunyamahoro. Hashize imyaka igera kuri 30 mumenye ariko namumenye birushijeho maze kuba umuyobozi we. Ndabivuga kuko burya ijoro ribara uwariraye. N’ubwo aba ari i Burayi aba ambaza ati 'ibi tubigenze dute?'. Agira umutima w’amahoro no kumvira abamuyobora."

Yasoreje kuri Padiri Chrysante Rwasa maze agira ati "Padiri Rwasa we mwahereye kare mutaka nabuze uko namuvuga. Ni umuntu wiyemeza akanyunyuzwa amaraso ariko abana be bakabaho neza. Ameze nka ya nyoni inyunyuzwa amaraso n’abana bayo rimwe na rimwe yayashiramo ikabura ubuzima. Padiri Rwasa waritanze kandi uracyitanga. Rwasa ni buji yaka, irashonga kuko yaka. Ni inyoni yagaburiye abana bayo kugira ngo abana bayo bagire umumaro, ntabwo mututse namutakaga."

Padiri Eugene Niyonzima umuyobozi w'umuryango w'abapalotini mu karere k'ibiyaga bigari akaba n'Umuyobozi w'Ihuriro ry'Imiryango y'Abihayimana mu Rwanda na we yagarutse ku bigwi byaranze aba bapadiri mu myaka 25 bamaze.

Avuga kuri yagize ati"Padiri Gérard Kamegeri ni umuvandimwe nkunda cyane. Mu myaka 25 amaze ari umupadiri, 23 muri yo yari umurezi w’Abapadiri. Umurimo wo kurera ndawuzi uravuna usaba kwigomwa. Ikindi mukundira muri ubwo buzima akora icyiza kuko ari cyiza akanga ikibi kuko ari kibi. Padiri Gérard ndamubatuye muzamukurikize."

Abakristu bamenye aba bapadiri na bo bavuze ibigwi byabo babashimira imbuto beze mu butumwa bamazemo imyaka 25.

Odette Mukansoro, mu izina ry’abakiristu ba Gikondo, yagize ati"Basaserdoti, ubupadiri bwanyu bwaboneshereje benshi. Mwatanze batisimu, ukarisitiya, ugukomezwa, ugushyingirwa ndetse no gushyingura kandi mwabyitwayemo neza. Misa za mu gitondo no gusura ingo z’abakirisitu inzu ku yindi ntabwo tuzabyibagirwa. Inyigisho zanyu zabaye ubuhamya kuri benshi."

Yashimiye by'umwihariko Padiri Chrisante Rwasa uruhare yagize ngo Gikondo ibone kiliziya ijyanye n'umujyi. Ati"by’umwihariko Padiri Chrysante Rwasa yatinyutse kwasa urutare rwa Nyakatsi rwahoze hano maze hazamuka Kiliziya Nziza turimo uyu munsi. Yashije ubujiji butandukanye bwari mu bakirisitu tugendera hamwe itafari riraboneka ubu twishyura Miliyoni 12 buri kwezi nta gutegwa kubera imbuto yasize abibye. Byamuviriyemo uburwayi ariko abanyagikondo turagukunda cyane kandi turagusabira."