“Kugendera hamwe ni bwo buzima bwa Kiliziya” — Ubutumwa bwa Papa Leo wa XIV ku bashakashatsi bateraniye i Camaldoli

Iyi nama igamije gusesengura no kungurana ibitekerezo ku kibazo cy’ingenzi kigira kiti: “Ni ubuhe buryo bw’Umwepiskopi muri Kiliziya ishingiye ku bumwe n’inama (synodal)?”

Ni inama y’iminsi ine yateguwe mu rwego rwo gutekereza birushijeho ku buryo Kiliziya y’iki gihe yakomeza guteza imbere imiyoborere ishingiye ku bumwe, inama no kumva ijwi rya buri wese – ari na bwo buryo Kiliziya yise “Sinodali.”

Mu butumwa bwihariye bwagejejwe ku bitabiriye iyi nama, Papa Leo wa XIV abinyujije kuri Kardinali Pietro Parolin, Umunyamabanga wa Leta ya Vatikani yashimangiye ko gukorera hamwe no kugendera hamwe (synodality) atari igitekerezo gishya, ahubwo ari imibereho ya Kiliziya ubwacyo.

Yagize ati“Iyi minsi ibatere kumva ko kugendera hamwe ari yo nzira nyayo y’ubuzima n’ubutumwa bwa Kiliziya.”

Yibukije ko nubwo atabashije kwifatanya n’abari aho ku mubiri, yifatanyije na bo mu buryo bwa roho, kandi ashima ubutwari n’ubuhanga bw’abashakashatsi bakomeje gufasha Kiliziya gutekereza ku hazaza h’ubuyobozi bwayo hashingiye ku bumwe n’ubwuzuzanye.

Ubutumwa bwa Papa bwagarutse cyane ku nshingano z’abepiskopi muri Kiliziya y’ubu. Yashimangiye ko Kiliziya ifunguye kandi yumva buri wese, aho umubatizwa wese agira uruhare mu buyobozi no mu butumwa, hakurikijwe umuhamagaro we.

Ariko kandi, Papa Leo wa XIV yanaburiye abibwira ko synodality isimbura ububasha bwa Kiliziya, yibutsa ko Kristu ubwe yashyizeho Koleji y’Abepiskopi ifatanyije n’Umusimbura wa Petero nk’umutwe wa Kiliziya.

Ati “Ntabwo dushobora kwirengagiza ububasha Kristu yahaye Koleji y’Abepiskopi ifatanyije n’Umusimbura wa Petero nk’umutwe wayo.”

Abashakashatsi bitabiriye iyi nama bemeje ko ibiganiro byayibayemo byari bifite ireme kandi bifunguye amarembo mashya yo guharanira Kiliziya ibereye bose, igendera hamwe, itarobanura kandi itegera buri wese

Basabye ko izi nama nk’izi zagirwa umwanya wihariye mu buzima bwa Kiliziya, kugira ngo amahame ya sinodi (gukorera hamwe no kumva bose) akomeze gushinga imizi mu mikorere n’imiyoborere yayo.

Mu gusoza ubutumwa bwe, Papa Leo wa XIV yibukije ko urugendo rw’Inkuru Nziza ari urwa bose, ko Kiliziya idashobora kwihugiraho cyangwa kwigira iy’abanyabwenge gusa. Yasabye ko imiyoborere yayo yubakira ku bumuntu, ku bumwe no ku gutega amatwi buri wese.

“Nta n’umwe ugenda wenyine,” ni amagambo yagarutsweho kenshi muri iyi nama, nk’isomo rikomeye rihamagarira Kiliziya y’ubu gufungura umutima n’umuryango wayo ku bantu bose.

Nk’uko abashakashatsi babyivugiye, bitabiriye iyi nama y’i Camaldoli ngo bayitezeho ko ishobora gufungura indi nzira nshya yo gutuma Kiliziya y’ubu ikomeza gukura mu bumwe, mu bumuntu no mu kumva ko nta n’umwe ugenda wenyine mu butumwa bwa Kiliziya