Muri Tanzaniya hateraniye Inama y'Abepiskopi bo mu Karere ku kibazo cy'Intanbara muri Kongo

Iyi nama yateguwe mu rwego rwa gahunda isanzwe y'Ihuriro ry'Inama z'Abepiskopi mu Rwanda, u Burundi na RDC, igamije kubaka amahoro n'ubuvandimwe mu karere k'Ibiyaga bigari.

Muri iyi nama u Rwanda ruhagarariwe na Nyiricyubahiro Antoni Karidinali Kambanda, Arikiyepiskopi wa Kigali na Perezida w'Inama y'Abepiskopi Gatolika mu Rwanda, Myr Visenti Harolimana, Umwepiskopi wa Ruhengeri akaba na Visi Perezida w'Inama y'Abepiskopi Gatolika mu Rwanda, Padiri Kayisabe Vedaste, Umunyamabanga Mukuru w'Inama y'Abepiskopi Gatolika mu Rwanda na Padiri Valens Niragire, Umunyamabanga Mukuru wa Komisiyo y'Ubutabera n'Amahoro mu Rwanda no muri Afurika yo Hagati.

Mu kiganiro Myr Donatien NSHOLE, Umunyamabanga Mukuru w'Inama y'Abepiskopi muri Kongo yagiranye na Radio Top Congo Fm, yagaragaje ko Kiliziya yo mu karere yiyemeje gutahiriza umugozi umwe mu gusabira amahoro muri aka Karere kabaye indiri y'Intambara.

Abajijwe impamvu Inama y'Abepiskopi mu Rwanda itagaragara cyabe mu kibazo cya Kongo, yaragize ati"Ibyo dukora byose ntabwo tubitangaza. Dukora ubuvugizi bwinshi ariko uko tugize icyo dukora ntabwo tubitangaza. Ikiri ukuri ni uko nabo bahangayikishijwe n'ibiba."

Myr Nshole yakomeje agira ati "Mu kwezi kwa mbere 2024 hamwe n'Abepiskopi bo mu Rwanda n'u Burundi na Kongo, twahuriye i Goma kugira ngo dufatanye gusaba amahoro. Hari n'izindi gahunda zambukiranya imipaka dufatanyije aho duhuza ababyeyi n'urubyiruko bo mu Rwanda na Kongo i Goma na Bukavu bagakorana ugasanga iby'intambara batanabirimo. Aka ni ko kazi ka Kiliziya."

Padiri Valens Niragire, Umunyamabanga Mukuru wa Komisiyo y'Ubutabera n'Amahoro mu Rwanda no mu karere k'Ibiyaga bigari, aganira na Kinyamateka yavuze ko Kiliziya mu karere yiyemeje gushyira imbere amahoro n'umubano mwiza ari na byo yifuriza akarere kose.

Padiri Valens avuga ko iyi nama ari imwe mu bindi bikorwa byinshi Kiliziya mu Karere yakoze mu rwego rwo gufasha akarere kugira amahoro n'umubano mwiza mu baturage bako.

Inama ihuje abahagarariye Inama z'Abepiskopi na Komisiyo y'Ubutabera n'Amahoro mu Rwanda, u Burundi na Kongo biteganyijwe ko izasozwa kuwa 26 Gashyantare 2025.