Myr Filipo Rukamba yatanze Amasakaramentu y'Ibanze mu Igororero rya Huye

Byari biteganyijwe ko abagororwa 19 bahabwa Batisimu hanyuma 29 bagakomezwa gusa mu bubasha bwe, Myr Filipo Rukamba yagennye ko abari bahawe Batisimu nabo bahabwa Isakaramentu ry’Ugukomezwa.

Mu butumwa bwe, Myr Filipo Rukamba yibukije abahawe Isakaramentu rya Batisimu ko icya mbere bagomba kuzirikana ari uko bagiye kuzukana na Yezu, abasaba kuva mu bubasha bwa Sekibi bakinjira mu Rumuri rw'Imana.

Yakomeje avuga ko amasomo matagatifu atari inkuru z’ibyabaye kera gusa ahubwo ko agamije gufasha abantu kuyasanisha n’ubuzima bw’iki gihe bityo bigire isomo bisiga.

Ashingiye ku masomo yasomwe, Myr Rukamba yavuze ko Imana ishaka gukiza buri wese kuko ari Imana y’Impuhwe kuri buri wese, ariyo mpamvu n’iyo umuntu agiye kure yayo ihora imukurikirana mu rukundo rwayo n’ineza yayo. Ati “Ntabwo ihagarara guhamagara wa muntu wagiye kure yayo ngo aze ayigane kuko izi neza ko umukiro wa Muntu ariyo.”

Yibukije abagororerwa mu Igororero rya Huye ko guhinduka, guhindura imico no kugarukira Imana aricyo Imana yifuza.

Ati “Imana ikoresha buri wese kugira ngo akize mugenzi we. Imana irakubwira iti ba wa wundi ukiza, wiba mu gice gisenya ahubwo ba mu gice cyubaka. Mwemwere gusa na Kristu.”

Igororero rya Huye rigororerwamo abagera ku bihumbi 14, baba mu bipangu bibiri [Igipangu cya Duterimbere na Turwubake]. Muri bo, abasaga ibihumbi bitanu ni Abakristu Gatolika babarizwa mu miryangoremezo 39, no mu miryango ya Agisiyo Gatolika n'amakoraniro y'abasenga 11.

Nyuma y’igitambo cya Misa, Myr Filipo Rukamba yahaye umugisha Taberenakuru iri mu Gipangu cyitwa Turwubake.