Myr Ntagungira yakiriwe mu maparuwasi ya Cyahinda, Nyumba na Rango

Izi Paruwasi zasuwe n'Umwepiskopi wa Diyosezi ya Butare zifite amateka yihariye. Paruwasi ya Cyahinda yatangiriyeho, yashinzwe mu 1945, iragizwa Mutagatifu Lawurenti. Ni Paruwasi ngari iherereye mu Karere ka Nyaruguru ikaba ifite abakirisitu barenga ibihumbi 45, babarizwa muri Santarali 5: Quasi Paruwasi ya Kibangu, Mwoya, Cyahinda, Ruko na Remera.

Ifite Uturere tw'ubutumwa 25 n'imiryangoremezo 173.

Paruwasi ya Nyumba yakomerejemo uruzinduko rwe, yashinzwe mu 1945 ishinzwe n'abapadiri bera, itangirira Nyagatama hafi ya Seminari nkuru ya Nyakibanda.Mu 1963 Paruwasi yimukiye ku gasozi ka Nyumba. Ubu ikaba imaze imyaka 3 ihambaje yubile y'imyaka 75.

Mu bikorwaremezo, iyi Paruwasi ifite ibigo by'amashuri Gatolika 7 ari byo: TTC Saint Jean Baptiste Cyahinda, Ecole primaire Saint Joseph Rubona, G.S Saint Laurent Cyahinda, G.S Saint Jean Bosco Mwoya, G.S Saint Dominique Savio Kibangu, G.S Saint Aloys Coko, G.S Mater Dei Kagarama. Ifite kandi Ikigo Nderabuzima cya Cyahinda.

Nyumba ni Paruwasi Iherereye mu turere tubiri: Huye na Nyaruguru. Ikaba ikora ku mirenge ya Mukura, Ngera na Rusenge.

Ifite kandi Santarali 4 ari zo: Nyumba, Mubumbamo, Rusenge na Ngera.

Ikanagira Uturere tw'ubutumwa 24, imiryangoremezo 95 n'abakirisitu barenga ibihumbi 20.

Mu bikorwaremezo ifite Amashuri ya Kiliziya Gatolika bafatanya na Leta 5 n'Ishuri ryigenga ry'incuke. Mu bigwi byihariye iyi paruwasi ifite ni uko yubatsemo amaseminari 2 makuru ari yo: Seminari nkuru ya Nyakibanda na Seminari Nkuru Nyumba.

Myr Ntagungira kandi yanakiriwe muri paruwasi ya Rango. Iyi paruwasi yashinzwe mu 1996 ishinzwe na Myr Gahamanyi Jean Baptiste, yitirirwa Mutagatifu Yohani Bosco.

Ifite Abakirisitu Ibihumbi 26 na Santalari 3 ari zo: Rango, Cyarwa na Sahera.Ifite kandi Uturere tw'ubutumwa 10 n'imiryangoremezo 81. Mu bihayimana bahabarizwa harimo:Abasaleziyani ba Don Bosco ( Salésiens de Bosco) ari nabo bashinzwe Paruwasi, Ababikira n'abafureri b'abagabuzi b'amahoro ya Kristu Mwami, Ababikira ba'abafaransisikani na "Les petites soeurs de l'enfant Jésus".

Mu mibereho myiza Rango ifite ibigo by'amashuri 5, ari byo: Don Bosco Rango TSS ( TVET SCHOOL), Regina Pacis, Groupe scolaire Saint Jean Bosco NKUBI na Groupe scolaire de Cyarwa.

Aho Umwepiskopi wa Diyosezi ya Butare Myr Jean Bosco Ntagungira yageraga hose abakirisitu, abihayimana, abanyeshuri n'abapadiri babaga baje kumwakira bamugaragarije ibyishimo mu mbyino n'indirimbo bamuha ikaze muri Paruwasi yabo ndetse bamwizeza ko biteguye kumufasha kugira ngo ubutumwa bwe buzagende neza.

Nyuma yo kumurikirwa imishinga inyuranye Paruwasi zifite, Myr Jean Bosco Ntagungira yijeje abakristu kuzakoresha imbaraga zose afite kugira ngo bakomeze guteza imbere Diyosezi.

Myr Filipo Rukamba yawiye abakristu ko yishimiye kubashyikiriza Musenyeri mushya wabo ngo bakomezanye urugendo abasaba kumukunda.