"Ntabwo muri ab'Iwawa muri ab'u Rwanda", Dr Jean Damascene NSHIMIYIMANA

Dr Jean Damascene yagize ati"Iyo tubonye abashyitsi nkamwe, biradushimisha. Abantu benshi usanga bavuga ngo ni ba bantu b'IWAWA. Aba bantu si ab'Iwawa. Ntabwo muri ab'Iwawa, muri ab'Igihugu cyacu."

Yakomeje agira ati"Iyo tubonye abantu baje kudusura, biba bivuguruza ya mvugo ngo ba bantu b'IWAWA. Twishimira ko hari abantu batekereza ko turi abantu b'Igihugu."

Dr Jean Damascene yashimiye Myr Anaclet ko yaje guha amasakaramentu uru rubyiruko. Avuga ko uru rubyiruko n'ubwo ruri IWAWA, ari n'abakristu bakaba n'abana ba Kiliziya.

Ati"Aba ni abakristu. Ni intama n'iyo zaba zarazimiye. Turabashimira ko mwaretse zazindi 99 mukaza kureba izi ntama zazimiriye mu myitwarire mibi, ubu zikaba zirimo kuva i buzimu zijya i buntu."

Muri uru ruzinduko ngarukamwaka, Myr Anaclet Mwumvaneza yari kumwe na Padiri Eugene Niyonzima, Umuyobozi w'Ihuriro ry'Abihayimana mu Rwanda. Yari kumwe kandi na Padiri Alexis Ndagijimana, Umuyobozi wa Komisiyo y'urubyiruko mu Nama y'Abepiskopi Gatolika mu Rwanda. Hari kandi Padiri Mukuru wa Paruwasi Crête Congo-Nil, ari na ho iki kirwa kibarizwa, n'abandi bapadiri n'abihayimana.

Muri uru ruzinduko kandi, Komisiyo y'urubyiruko yagejeje ku bagororerwa Iwawa impano ya Bibiliya ndetse n'imyenda n'imipira y'umukino w'Umupira w'Amaguru (footbal).

Mu gitambo cya Misa yatuye, 31 bahawe Isakaramentu ry'Ugukomezwa, 41 bahabwa Isakaramentu rya Batisimu naho 5 bakirwa muri Kiliziya Gatolika.