Ntibitangaje kubabarira kuri iyi si: Ubutumwa bwahawe Kominote ya Emmanuel i Kibeho

Ni urugendo nyobokamana rwakozwe n’abagize Kominote ya Emmanuel ku Rwego rw’Igihugu bari kumwe n’ababarizwa mu makoraniro yose atandukanye afashwa na kominote baherekejwe n’abapadiri batandukanye barimo n’ababarizwa muri iyi Kominote , abihayimana babarizwamo n’incuti zabo.

Abakoze urugendo nyobokamana mbere y’igitambo cya Misa yayobowe na Padiri Felicien Mujyambere ubarizwa muri iyi Kominote ukorera ubutumwa kuri Centre de l’Emmanuel unayobora Urugo rw’Umutima Mutagatifu wa Yezu, babanje gusingiza Imana, gutaramira Umubyeyi Bikira Mariya ndetse banagezwaho inyigisho bahawe na Padiri Mwitegere Théodose ukorera ubutumwa muri Diyosezi ya Nyundo.

Padiri Mwitegere Théodose agaruka kuri iyi nsanganyamatsiko ‘’Umwana wa Bikira ntatana n’Imibabaro’’, Yavuze ko ari amagambo ya Bikira Mariya ubwe yavugiye i Kibeho, aho yavuze ayo magambo ababaye ashaka kwibutsa, kuko Yezu Umwana we yari yarabivuze abibwira abigishwa be aho yavuze ati '' ushaka kunkurikira aheke umusaraba we''.

Yavuze ko uburyo umuntu ashobora kwitwara ari mu kababaroharimo kwihambira ku kwemera, kurwana n'ububabare nkuko Yezu yarwanye nabwo, gutega amatwi ugushaka kw'Imana, kwirinda kwiheba no kwifashisha ububabare bwawe kugira ngo uhongerere ibyaha byawe n'ibyabandi.

Atanga ubuhamya kuri iyi ngingo Yavuze ko we ubwe yiyumvisemo umuhamagaro wo Kwiha Imana ku myaka 8, igihe yari yagiye mu Misa yatangiwemo Ubupadiri agira ibyishimo byinshi Mama we amubwira ko nawe ashobora kuba Padiri bimubera imbarutso kuva ubwo. Avuga ko kugira ngo abigereho yanyuze mu mubabaro w’uburwayi.

Ati’’ Impano iruta izindi Imana yampaye ni ububabare kuko iyo ntaza kubabara simba ndi hano nta nubwo mba ndi Padiri, Ububabare rero mujye mubwitondera, kuko ni ikintu gikomeye cyane’’.

Avuga ko bidatangaje kubabarira muri iyi si ariko hari igihe imibabaro izashira igihe tuzaba twageze i wacu hakuru duharanira nkuko igitabo cy’ibyahishuwe kibivuga. Ati ‘’Tugende tubabara ariko mu kwemera nitugera i wacu mu ijuru tuzishima ubuziraherezo’’.

Myr Eugene Dushimurukundo igisonga cy’Umwepiskopi wa Diyosezi ya Gikongoro ari nawe muyobozi w’Ingoro ya Bikira Mariya i Kibeho, yashimiye Kominote ya Emmanuel yateguye iyi gahunda, abashimira kandi uburyo babafasha mu butumwa bwa Kilizya abasaba gukomeza gufatanya kugira ngo barusheho kubaka ingoma ya Kristu mu gihugu cyabo, anabashimira inkunga batanze kandi bagitanga mu kwagura ingoro ya Bikira Mariya.

Myr Dushimurukundo Yaboneyeho kubatumira mu munsi mukuru ukomeye wa Bikira Mariya uzaba ku wa 28 Ugushyingo 2024, ubwo bazaba banahimbaza isabukuru ya 43 y’amabonekerwa ya Kibeho.

Umuyobozi wa Kominote ya Emmanuel mu Rwanda Albert Kayigumire, yavuze ko bishimiye kuba bakoreye urugendo nyobokamana ku ngoro ya Bikira Mariya i Kibeho avuga ko biyemeje kujya bagera i Kibeho byibura rimwe mu mwaka, abayobozi babo bakaza mbere yaho umunsi umwe bahereye mu rugo rwa Rugamba Sipiriyani na Daforoza ruri i Butare bakagera i kibeho n’amaguru basenga, bahetse ibibazo by’abagenzi babo kugira ngo batakambire umubyeyi Bikira Mariya.

Ati ‘’Dusenge kandi tuvuge ishapure atari uko twaje i Kibeho gusa ahubwo tuyivuge no mu rugo, imibabaro dufite izatuviremo ibyiza, tugwa tubyuka kugeza tugeze mu ijuru, Tumere nka Rugamba Sipiriyane wagize ati ‘’Turere abana, tugishe inama tubiture Imana’’.

Urugendo nyobokamana i Kibeho rwakozwe nabagize Kominote ya Emmanue barenga ibihumbi 2 barimo n’incuti zabo.