Padiri Gustavo Gutierrez wigishije iyobokamana ryita ku bakene yitabye Imana
Padiri Gustavo Gutierrez wo mu gihugu cya Peru, wamenyekanye cyane kubera Inyigisho ze zagaragazaga ko iyobokamana rigomba kwita ku bibazo by'abakene, yitabye Imana kuri uyu wa 22 Ukwakira 2024.
Padiri Gustavo ni we wazanye inyigisho za Tewolojiya zaharaniraga gukemura ibibazo by'ubukene n'akarengane kagirirwa abaciye bugufi.
Izi nyigisho zamenyekanye mu 1960, zikaba zaraje ari igisubizo ku bibazo by'akarengane kari kose muri Amerika y'Amajyepfo. Gustavo yagaragaje ko ukwemera k'ukuri kugomba gusubiza ibibazo by'abaturage birimo ubukene, ihezwa n'ibindi.
Mu 1971 Padiri Gustavo yanditse igitabo yise"Theology of liberation". Iki gitabo kikaba cyaragize uruhare rukomeye mu gucengeza izi nyigisho muri Amerika no hanze yayo.
Padiri Gustavo yavukiye muri Peru mu 1928. Yize ubuvuzi, nyuma aza kwiga Filizofiya, Psikolojia na Tewolojiya. Yahawe ubupadiri mu 1959, naho mu 1999 yinjira mu muryango w'Abadiminikani.
Yigishije igihe kinini muri Kaminuza Gatolika ya Lima aho yigishaga ku bibazo bibangamiye abaturage bo muri Amerika y'Amajyepfo.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
