Papa Leo wa XIV arashimira abarundi bakomeje kubungabunga urwibutso rwa Mgr Michael Courtney

Umuryango Fraternité de Mgr Courtney washinzwe mu rwego rwo kurinda urwibutso rwa Musenyeri Michael Aidan Courtney, wahoze ari Intumwa ya Papa mu Burundi, wishwe arashwe mu mwaka wa 2003, mu bihe by’intambara yabaye muri iki gihugu cy’u Burundi. Uretse kubungabunga izina rye, uyu muryango wiyemeje gukorera mu izina rye mu bikorwa byo guharanira amahoro, gufasha abakene, abafite intege nke n’abatishoboye, no guteza imbere ibikorwa by’urukundo n’ubutabera.

Papa Leo wa XIV yashimye cyane iki gikorwa, yibutsa ko Mgr Courtney yari umuntu w’ineza n’ubwitonzi, witanze kugeza atanze ubuzima bwe ku bw’amahoro n’ubumwe bw’Abarundi. Yashimye kandi ibikorwa bifatika by’uyu muryango, birimo kubaka ivuriro ryitiriwe Mgr Courtney ndetse no kubaka urwibutso aho yiciwe, nk’ikimenyetso cy’urukundo n’icyizere.

Mu butumwa bwe, Papa yibukije ko Yubile ya 2025 ifite insanganyamatsiko igira iti “Icyizere cy’ubuzima ni Kristu”. Yagize ati“Ibyiringiro byacu nyabyo ni Yezu Kristu. Ni We wenyine byiringiro by’isi yose.”

Yashimye urugendo rw’abarundi abita abahamya b’ukwemera, kuko bahagurutse bakaza guhura na Kristu, kugira ngo bamushyire ku isonga ry’ubuzima bwabo n’ubw’isi.

Papa Leo yabasabye gusubira mu mirimo yabo ya buri munsi bakomejwe mu byiringiro, biteguye gukorera iterambere ry’umuntu wese mu mucyo w’Ijambo ry’Imana.

Yabashishikarije gukomeza kuba intumwa z’amahoro n’ubumwe, ati “Mukomeze kubaho mu byiringiro by’isi nziza. Nimwiyunga na Kristu, imirimo yanyu izera imbuto kandi izagororerwa.”

Mu gusoza, Umushumba wa Kiliziya Gatolika ku isi, yashyize igihugu cy’u Burundi mu maboko ya Bikira Mariya, Umwamikazi wa Rozari, abaha umugisha wa gishumba, abasaba gukomeza kuba abahamya b’amahoro n’icyizere mu karere kabo no ku isi yose.