Sainte Famille Hotel ifatanyije n'Itsinda "Five Bright Singers" yateguye igitaramo kidasanzwe cy'umunsi mukuru w'Asomusiyo

Nk'uko Kinyamateka yabitangarijwe na Padiri Ruvuzandekwe Simon, Umuyobozi w'iyi Hotel, iki gitaramo cyateguwe mu rwego rwo kubahiriza umwihariko w'ubutumwa bwayo nka Hotel ya Kiliziya no gufasha abakunda kuyisohokeramo kwinjira mu byishimo by'umunsi mukuru ukomeye w'Asomusiyo.

Yagize ati "Dusanzwe dukora ubutumwa bwa Hotel bwo kwakira neza abatugana no kubafasha kwidagadura. Ariko mu kuzirikana ko Sainte Famille ari Hotel yihariye. Twatekereje ko hari abantu baba bashaka kwidagadura ariko gikirisitu. Turavuga tuti ubwo hari umunsi mukuru w'Asomusiyo reka dushyireho igitaramo gikirisitu tugihuze n'imikorere isanzwe ya hotel yo gufata neza abaje".

Iki gitaramo kizatangira Saa kumi n'ebyiri z'umugoroba kugera Saa mbiri, kizabera mu ruganiriro rusange rwa Sainte Famille Hotel, aho abari mu gitaramo bazakomeza no kwitabwaho n'abakozi ba Hotel bitewe n'icyo buri wese yifuza. Nta mafaranga yo kwinjira ateganyijwe nk'uko bisanzwe mu bindi bitaramo ndetse hotel yateganyirije abazitabira iki gitaramo uruhisho mu rwego rwo kubafasha kwishimira umunsi mukuru w'Asomusiyo. Abazitabira iki gitaramo bakaba basabwa kuzahagerera igihe kuko igitaramo kitazamara igihe kirekire.

Padiri Simon, Umuyobozi wa Sainte Famille Hotel, avuga ko iki gitaramo ari amahirwe akomeye ku bagana iyi Hotel baba abasanzwe ari abakristu gatolika n'abandi. Avuga ko ntawe ukwiye kwiheza muri iki gitaramo kubera ukwemera kwe, kuko abazaza bakumva indirimbo ziririmbwe neza n'abantu babifitiye impano, bazahakura ingabire y'ibyishimo, bakumva banyuzwe ku mutima babikesha Ingabire y'Imana umuremyi w'abantu bose.

Akomeza avuga ko igitaramo nk'iki ari uburyo Hotel ikoresha ngo igire uruhare mu iyogezabutumwa, kuko nk'urugo rwa Kiliziya Gatolika ibikorwa byayo bitagarukira ku bucuruzi. Padiri Simon asaba abakristu kwitabira no gushyigikira iki gikorwa Kibaye ku nshuro ya mbere, kuko ari uburyo bwo gushyira mu bikorwa Iyogezabutumwa rivuguruye aho Kiliziya isohoka igasanga abantu aho bari nk'uko Papa Fransisiko adahwema kubisaba.

Mugwaneza Jean Marie Vianney mu izina ry'itsinda Five Bright Singers, aganira na Kinyamateka, yadutangarije ko iri tsinda ryishimiye iki gitekerezo avuga ko ubundi bari basanzwe bakora ibitaramo bateguye mu yandi mahoteli n'iminsi mikuru itandukanye ariko ko batari barigeze batumirwa na Hotel ngo bakore igitaramo nk'iki, ibintu abona nk'agashya.

"Five Bright Singers" ivuga ko itewe ishema no gukora iki gitaramo ndetse ko yifuza ko cyanakomeze haba muri iyi Hotel ndetse n'andi mahoteli abyifuza. Nk'abasanzwe bakora Iyogezabutumwa mu ndirimbo abantu b'ingeri zitandukanye bakabyishimira; iri tsinda rivuga ko ari Ibyishimo bikomeye gukorana ubu butumwa n'abashinzwe izindi serivisi z'Iyogezabutumwa rya Kiliziya, bakanatumirwa mu zindi gahunda za Kiliziya. Ibintu bemeza ko ari uburyo bwiza bwo kubafasha kurinda umwimerere Gatolika wabo.

Avuga aho iri tsinda rigeze ryitegura iki gitaramo, Mugiraneza JMV, yagize Ati " Ibyo tubahishiye ni byinshi. Twateguye Indirimbo nziza kandi zinyuranye, zirimo iz'ikinyarwanda n'izo mu mahanga. Amajwi ameze neza ibyuma twarabiteguye igisigaye nta n'iyonka igomba gusigara. Muzahagere kare nka mbere y'iminota makumyabiri mutazasanga huzuye mukazabyumvira kure kandi bizaba biryoshye cyane".