Seminari Nto ya Karubanda yateguye ku nshuro ya 18 irushanwa ryitiriwe Kwibuka Rutsindura

Mu cyiciro cy'abagabo mu bakina barabigize umwuga, ikipe ya Gisagara Volleyball Club ni yo yegukanye igikombe, nyuma y'umukino utari woroshye wayihuje n'ikipe ya REG Volleyball Club, ukarangira Gisagara itsinze ku maseti 3 kuri 2 ya REG. Nyuma yo kugabana amaseti yose uko ari ane y'umukino, aya makipe yaje gukizwa na Seti ya kamarampaka maze Gisagara iyitwara ku manota 15 kuri 13 ya REG.

Mu bindi byiciro, ikipe ya UVC ni yo yatwaye igikombe mu cyiciro cy'abagore nyuma yo gutsinda APR Volleyball Club naho ikipe ya College du Christ Roi itwara igikombe mu kiciro cy'abanyeshuri nyuma yo gutsinda ikipe ya Seminari Nto ya Karubanda ari na yo inategura iri rushanwa.

Mu cyiciro Rusange cy'amashuri yisumbuye GSO Butare ni yo yatwaye umwanya wa mbere itsinze Seminari Nto ya Karubanda; naho mu Bavetera Relax itsinda Umucyo amaseti 3 kuri 2 ; mu gihe mu kiciro cy'amashuri abanza igikombe cyatwawe na GS Kigeme itsinze GS Mugombwa.

Aya marushanwa yatangiye mu 1996 abaye ku nshuro ya 18, nyuma y'imyaka 2 adakinwa kubera icyorezo cya Covid-19. Mbere y'uko imikino itangira, tariki 17 Kamena 2022, habaye igikorwa cyo kwibuka Alphonse RUTSINDURA, wari umwarimu w'Ikilatini mu Iseminari Nto ya Karubanda, wazize Jenoside yakorewe abatutsi muri Mata 1994. Nk'uko kandi bitangazwa na Padiri Jean Baptiste NDAHIMANA, umuyobozi wa Seminari Nto ya Karubanda, muri iki gikorwa Seminari yibuka n'abandi barimu ndetse n'imiryango yabo bazize Jenoside yakorewe Abatutsi muri Mata 1994.

Rutsindura Alphonse witiriwe iri rushanwa, uretse kuba yari umwarimu w'ikilatini ku karubanda, yari n'umutoza w'ikipe ya Seminari ya volleyball ndetse agatoza n'ikipe y'igihugu y'abakobwa. Padiri Jean Baptiste, Umuyobozi wa Seminari, avuga ko Rutsindura yagize uruhare rukomeye mu gutuma Seminari ya Karubanda iba igicumbi cy'umukino wa Volleyball kugera n'ubu. Avuga ko yakundaga cyane uyu mukino ku buryo no mu gihe cy'ibiruhuko yabaga afite abana atoza. Rutsindura kandi anibukwa nk'umunyamuziki dore ko ari na we washinze Korali Ijuru ikorera ubutumwa muri Katedarali ya Butare.

Nkurikiyinka Jean, umwe mu bigishijwe na Rutsindura, avuga ko Memorial Rutsindura, ari igikorwa bishimira nk'abantu babaye muri Seminari ya Karubanda. Avuga kandi ko gifite uruhare rukomeye mu gukomeza kubaka ubumwe n'ubwiyunge mu banyarwanda, kuko cyunganira izindi gahunda za Kiliziya Gatolika na Leta zigamije kubaka ubumwe n'ubwiyunge. Umuyobozi w'Akarere ka Huye Ange Sebutege, yashimiye Umuryango wa Seminari ya Karubanda n'abo bafatanya gutegura iki gikorwa, avuga ko iyi mikino ari ikimenyetso cy'umuryango nyarwanda wiyemeje kubaka ubumwe kandi ko ifasha abato kumenya amateka y'igihugu. Umuyobozi wa Ibuka, Egide NKURANGA, yasabye abato kurwanya ingengabitekerezo ya Jenoside.

Amakipe yatsinze iri rushanwa akaba yarahawe ibihembo bitandukanye aho ikipe yatwaye igikombe mu bagabo n'abagore bakina nk'ababigize umwuga bahawe igikombe n'amafaranga miliyoni imwe n'ibihumbi magana atanu (1,500,000); Mu bakina batarabigize umwuga no mu kiciro cya Kabiri cy'amashuri yisumbuye bahabwa igikombe na miliyoni imwe n'ibihumbi magana abiri na mirongo itanu (1,250,000); mu gihe abo mu kiciro rusange c'amashuri yisumbuye bahawe ibihumbi 150 naho abo mu mashuri abanza bahawe ibihumbi 80. Bahawe kandi n'ibindi bihembo birimo imipira yo gukina.

Seminari Nto ya Karubanda yishimira ko ikomeje kuba igicumbi cy'umukino wa Volleyball kandi iviga ko ikomeje gukora ibishoboka byose mu rwego rwo guteza imbere uyu mukino.