Ubutumwa Abepiskopi ba Kiliziya Gatolika mu Rwanda bageneye Abakristu ku Munsi mukuru wa Pasika 2023

Izuka rya Kristu riherekeza kandi rikamurikira umukristu mu gihe cy’icyunamo

Kuri twebwe abakristu b’Abanyarwanda, uyu munsi wa Pasika, tudashobora kwimura,

uyu mwaka uhuriranye n’igikorwa ngarukamwaka cyo kwibuka ku nshuro ya 29, Jenoside

yakorewe Abatutsi mu w’1994. Duhimbaza Pasika dushimira Imana urukundo yadukunze mu

Mwana wayo Yezu Kristu, We wadukunze kugeza ku ndunduro mu rupfu rwe n’izuka rye.

Kuyihimbaza mu gihe cy’icyunamo turimo iwacu mu Rwanda, ntitubifate nk’ibintu bibiri

bihabanye; ahubwo bitume turushaho kuzirikana uburemere bw’icyaha cya muntu, udatinya

gucura umugambi utambamiye ugushaka kw’Imana, wo kugambanira, gutoteza. kwica rubozo

no kurimbura ubwoko uziza abantu uko bavutse, nk‘uko byakozwe muri Jenoside yakorewe

Abatutsi muri 1994. Nyamara ariko tunazirikane urukundo rukomeye rw’Imana n’impuhwe zayo

bisumba kure icyaha cya muntu. Bityo rero, iyobera ry’izuka rya Yezu Kristu niriduherekeze

kandi ridukomeze muri iki gihe cy’icyunamo igihugu cyacu kirimo.

Pasika ya Nyagasani Yezu Kristu iratureba natwe, kuko ihindura ubuzima bw’abemera,

igatanga amizero ku bantu muri rusange. Koko ubuzima, urupfu n’izuka bya Yezu Kristu,

bidufasha guhindura imyumvire yacu y’ubuzima: gusamwa, kuvuka, kubaho no gupfa kuri

twese. Mu buzima, mu butumwa, mu rupfu n’izuka bya Kristu, tubonamo isano iri hagati

y’ubuzima n'urupfu, ibyishimo n'akababaro, ingorane z’ubuzima zitera kwiheba, n’ibyiza

bidufasha gukomeza kwizera. Indunduro ya byose ikaba amizero muri Kristu wazutse, We ugira

ati: «Nijye Uvdbanze n 'Uwimperuka, kandi n ’Uriho; narapfuye none dore ndi muzima uko ibihe

bihora bisimburana iteka, mfite imfunguzo z’urupfu n’iz’ubuzima» (Hish 1, 17 -18).

Kwibuka abacu batuvanywemo turi mu rumuri rwa Pasika, ni ukubazirikana dushingiye

ku mateka y’ugucungurwa dusangiye twese muri Yezu Kristu wadusezeranyije kuvugurura

byose akabigira bishya, maze tukabana n’Imana yacu turi abantu bayo koko. Imana izahanagura

“icyitwa amarira cyose ... n ’urupfu rwoye kuzongera kubaho ukundi. Icyunamo, amaganya

n’imibabaro, nabyo ntibizongera kubaho ukundi" (Hish 21, 4). Abakristu twumve rwose kandi

twumvishe abandi mu mvugo no mu ngiro ko akababaro, icyunamo n’urupfu bizashira, ariko

urukundo Imana yatugaragarije muri Yezu Kristu n’umutsindo we duhimbaza muri Pasika byo

bitazashira. Duharanire kandi ko natwe abacu bapfuye batatubona uko badusize, ahubwo bishimire ko ubuzima bwacu mûri iki gihe bwacumbukura ikivi basize. bukaduhesha icyubahiro

n’ishema, bishingiye ku kwemera nk’uko Pawulo Mutagatifu abidushishikariza agira

ati:«Bavandimwe, ntabwo dushaka ko muguma mu bujiji ku byerekeye abapfuye kugira ngo

mudaheranwa n ’ishavu nk’abandi batagira icyo bizera» (1 Tes 4,13).

Guhimbaza Pasika twibuka amateka y’irondakoko, y’urwango n'ubwicanyi byaranze iki

gihugu cyacu, kugeza ku mahano ya Jenoside yakorewe Abatutsi muri 1994, ni ukwiyemeza

kudaheranwa n’urupfu, ni ukwemera kurangamira Yezu Kristu wazutse akadusakazaho amahoro

ye, akadufasha kurenga imyumvire mibi, tukitaza imigambi n’indi myitwarire yose ishora mu

rupfu igapfukirana amizero, maze Kristu akatuzahura nkuko yabigenjereje intumwa zigatinyuka

kumubera abahamya. Bityo iyobera rya Pasika niridufashe kubona ko Imana ifite ububasha bwo

kudufasha kugira ukwizera no mu bihe bibi, ikatugira umuryango umwe urangwa n’urukundo,

ubuvandimwe n’imbabazi, kugeza n'aho twahamya nka Pawulo tuti: «Aho icyaha cyakwiriye,

ineza yarushijeho kuhasendera kugira ngo nkuko icyaha cyari cyaraganje mu rupfu, n ’ineza

izaganze mu butungane butanga ubugingo bw’iteka muri Yezu Kristu Umwami wacu» (Rom 5,

20).

Urugero rw ’intumwa mu rugendo rwo kwemera no guhamya Yezu Kristu wazutse

Intumwa za Yezu Kristu zabanye na We, zabonye ibitangaza yakoze, zirebera urukundo

ruhebuje yazigaragarije kandi akaruzitoza, nyamara mu gihe cy’urubanza rwe ashinjwa

ibinyoma, ziricecekera, Petero aramwihakana, ndetse no mu gihe cyo kubambwa ku musaraba

zari zahunze. Amaze kuzuka zatinze kwemera ko ari muzima. Nkuko twabyumvise mu Ivanjili,

mu gitondo cya Pasika Mariya Madalena amaze kubwira Petero na Yohani Intumwa ko

Nyagasani bamukuye mu mva bihutiye kujyayo basanga yazutse koko atakiri mu mva. “Nuko

Yohani ahageze arunama, abona imyenda irambitse, ariko ntiyinjira mu mva. Simoni Petero

wari umukurikiye aba arahageze, yinjira mu mva abona imyenda irambitse, n ’igitambaro bari

bamupfukishije umutwe we kitarambitse hamwe n ’imyenda, ahubwo kizingiye ukwacyo ahandi

hantu. Nuko wa mwigishwa wari wageze mbere kumva na we arinjira, aritegereza maze aremera

» (Yh 20, 1-9).

Tuzi ko na bamwe mu bigishwa bajyaga Emawusi bakoranye na we urugendo bataramumenya,

maze ku bw’Ijambo rye n’imanyura ry’umugati, ari yo Ukaristiya, baza kwemera ko ari Kristu

wazutse bituma bava mu cyunamo bityo bajya kumuhamya mu bandi, babaha ukwizera.

Nyuma yo kuzuka na none, Yezu yabonekeye intumwa ze mu minsi mirongo ine azihumuriza,

azibutsa ibyo yari yarazibwiye, bigeza naho azoherereza Roho Mutagatifu ku munsi wa

Pentekosti kugira ngo zimubere abahamya, zamamaza iyo Nkuru Nziza hose. Ni byo Petero

avuga ashize amanga imbere y’abatware n’abakuru b’umuryango ati: «Nimumenye neza rero,

mwebwe mwese n ’umuryango wose wa Israheli, ko izina rya Yezu Kristu w ’i Nazareti mwebwe

ubwanyu mwabambye, Imana ikamuzura mu bapfuye, ariryo uyu munsi akesha kuba ahagaze

imbere yanyu ari mutaraga. Yezu uwo ni We rya buye ryajugunywe namwe abubatsi, nyamara

rigahinduka insanganyarukuta. Bikaba rero nta wundi wundi twakesha umukiro usibye We, kuko

ku isi nta rindi zina abantu bahawe, ngo abe ari ryo turonkeramo uburokorwe». (Intu 4,10-12)

No mu gihe cya Jenoside yakorewe Abatutsi mu 1994, hari abagize ubutwari nk’ubwa

Yohani Intumwa waherekeje Yezu kugeza ku musaraba, hamwe na ba bagore bari bifatanyije

n’Umubyeyi Bikira Mariya. Muri ibyo bihe bibi by’amateka yacu kandi harimo n’ababaye nka

Simoni w’i Sireni, watwaje Yezu umusaraba, abandi bagenza nka Nikodemu na Yozefu wa

Arimatiya bamushyinguye. Muri iryo curaburindi twanyuzemo, hari abataragamburujwe n’inabi

bagaragaza umutima mwiza w’ubuntu n’ubukristu bitangira abandi.

Dushingire amizero yacu muri Yezu Kristu wazutse

Bakristu dukunda,

Usibye iyi minsi y’umwihariko w’icyunamo turimo mu gihugu cyacu, iyo twubuye

amaso tubona ko isi yacu yugarijwe n’ibibazo bikomeye birimo intambara zidahwema guhitana

abantu b’inzirikarengane, ubukene bwugarije igice kinini cy’abantu babura iby’ibanze kugira

ngo babeho, ubuhunzi n'ibibazo bijyana nabwo, hari kandi n’abagihembera inzangano

birengagiza ingaruka zabyo ku buzima bw’abantu.

Ibyo byose ntibikwiriye kudukangaranya. Ahubwo ni igihe cyo gukomera mu kwemera,

mu kwizera no mu rukundo; ni igihe cyo kwakira ihumure dukesha Umwami wacu Yezu Kristu

no guhumurizanya nk'uko Pawulo intumwa abiturarikira agira ati: «Umwami wacu Yezu Kristu

ubwe, hamwe n ’Imana Umubyeyi wacu wadukunze, maze ku neza ye akaduha kwizera ihumure

ritazashira, bo nyine nibabahumurize kandi babahe gukomera mu byiza byose mukora cyangwa

muvuga» (2 Tes 2, 16-17).

Gushingira amizero yacu muri Kristu wazutse nibirangwe n'ibikorwa by’urukundo: tube

hafi ku buryo bw’umwihariko abarokotse Jenoside, twite ku bababaye b’ingeri zinyuranye, kandi

dukomeze ubutumwa bwa Nyagasani Yezu Kristu bwo guharanira amahoro, ubumwe

n’ubwiyunge, ubutabera n’imbabazi, dushize amanga, twunze ubumwe na We, We udutera

ubutwari agira ati: «Nimukomere isi narayitsinze» (Yh 16,33).

Nkuko turi no mu rugendo rwa Sinodi, tuzirikane kugendera hamwe, gufatanya ubutumwa

kugirango turusheho kuba abahamya ba Yezu Kristu wazutse.

Tubifirije mwese Pasika Nziza. Nyagasani Yezu Kristu wazutse, Umwami

w'amahoro, nasakaze ibyishimo n’amizero mu miryango yanyu. Nabere inkingi y’ubuzima

bushya impfubyi n’abapfakazi. nabohore imbohe ku mutima no ku mubiri; bityo izuka rya Yezu

Kristu duhimbaza none, rihe buri wese imbaraga zo kumubera umuhamya. «Imana Yo soko

y ’amizero, nibuzuze ihirwe ryose n ’amahoro mu kwemera kugira ngo musenderezwe ukwizera

ku bw 'ububasha bwa Roho Mutagatifu» (Rom 15, 15).

Tubaragije Umubyeyi Bikira Mariya, Nyina wa Jambo, Umwamikazi w’amahoro

n’Umubyeyi wa Kiliziya.

Bikorewe i Kigali, ku wa 23 Werurwe 2023

Abepiskopi banyu.